Прыватны дом Веслава Меданоўскага могуць зьнесьці да 1 чэрвеня. Нягледзячы на рашэньне суду Кастрычніцкага раёну, яму дагэтуль ня выдзелілі для пабудовы дома ўчастак узамен таго, які аднялі.
Чаму зносяць дом?
Больш за год таму Свабода пісала пра высяленьне менчука Веслава Меданоўскага зь яго прыватнага дома на завулку Вільямса, 13. Праз будоўлю комплексу Minsk World, якую разгарнула кампанія «Дана Астра» (уваходзіць у «Дана Холдынгз»), дом Веслава Меданоўскага трапіў пад знос. За дом ён атрымаў грашовую кампэнсацыю. Але згодна з указам Лукашэнкі № 58, замест адабранага зямельнага ўчастка яму мусілі даць без чаргі і правядзеньня аўкцыёну раўназначны ўчастак для будаўніцтва новага дома.
Для вырашэньня свайго пытаньня Веслаў Меданоўскі зьвяртаўся год таму да кіраўнікоў Беларусі і Сэрбіі. Аднак адказу ад іх не атрымаў, і дагэтуль улады не пайшлі насустрач сям’і Меданоўскага.
Веслаў Меданоўскі працуе выкладчыкам у менскім мэдычным каледжы, ён віцэ-старшыня пчалярскіх арганізацый Беларусі BelApiUnion, прэзыдэнт Мэдычнай Палёніі Менску і Менскай вобласьці.
У 2011 годзе ён купіў палову прыватнага дома плошчай 63 квадратныя мэтры, каб рэканструяваць і жыць там разам з двума сынамі. Калі купляў дом, яму казалі, што яго можна рэканструяваць. Але пазьней яму адмовілі ў рэканструкцыі, бо ўсё вырашылі зносіць дзеля будоўлі. Тады яшчэ было невядома, што будуць будаваць, а аэрапорт яшчэ дзейнічаў. Веслаў Меданоўскі зьвярнуўся да ўладаў, каб яму далі магчымасьць пабудаваць дом у Менску наўзамен таго, які зьнясуць. Аднак участку ў Менску ўлады не далі. Мянчук пагадзіўся на ўчастак з камунікацыямі ў Менскім раёне, аднак высьветлілася, што яны выдаюцца толькі па выніках аўкцыёнаў.
«Атрымліваецца, мы будзем бяздомнымі»
Веслаў Меданоўскі пабываў на прыёме ў старшыні Менгарвыканкаму Ўладзімера Кухарава.
«Быў ён, памочнік прэзыдэнта пры Менгарвыканкаме і прадстаўнік архітэктурнага аддзела. Была цікавая іх рэакцыя: яны ведаюць, што тут зямля будзе адведзена пад катэджы. Я ўжо не прашу ўчастак у Менску, няхай мне дадуць у раёне, — кажа Веслаў. — Перад гэтым я знайшоў два ўчасткі ў Тарасаве і ім даслаў прапановы. На гэта Кухараў мне адказаў, што гэтыя ўчасткі выстаўленыя на аўкцыён. Маўляў, трэба было выбраць кватэру і жылі б цяпер з камфортам. То бок ён вырашае за мяне, якое жыльлё патрэбна маёй сям’і!»
Па словах Меданоўскага, кіраўнік Менгарвыканкаму паведаміў, што яго выселяць да 1 чэрвеня.
«Я прасіў у Кухарава дазволу, каб ад яго імя зьвяртацца ў сельсаветы з просьбай перавесьці для мяне ўчастак, які выстаўляецца на аўкцыён. Канкрэтнага адказу я не атрымаў, — кажа Веслаў. — Таму нас будуць зносіць, але я трымаюся дагэтуль. Я ведаю, што, як толькі зьнясуць мой дом, то яны тым больш не дадуць нам участак. Калі яны нам ня выдзелілі ўчастак з 2017 году, то цяпер тым больш выкінуць нас, і ўсё. Цяпер жа, паводле заканадаўства, высяленьне адбываецца на вуліцу з прысваеньнем статусу асобы бяз пэўнага месцажыхарства. Атрымліваецца, мы будзем бяздомнымі».
Паводле Веслава Меданоўскага, знайсьці ўчастак паводле прэзыдэнцкага ўказу № 58 «Пра некаторыя захады па абароне маёмасных правоў пры забіраньні зямельных участкаў для дзяржаўных патрэб» немагчыма. Усе ўчасткі са сьпісу Менскага райвыканкаму былі без камунікацый. А каб іх правесьці, трэба патраціць значную суму з атрыманай грашовай кампэнсацыі за дом (амаль 150 тысяч рублёў).
«Суседзі атрымалі ўчастак без камунікацый у Менскім раёне. Каб правесьці камунікацыі, улады налічылі 20 тысяч даляраў. А ўчастак на 15 сотак яны купілі за 60 тысяч даляраў. Вось якія сумы. То бок атрымліваецца, што кампэнсацыю, якую мне далі за знос дома, я павінен патраціць на ўчастак».
Веслаў дагэтуль не падпісаў дакумэнт на адчужэньне нерухомасьці, хаця на судзе прадстаўнік упраўленьня капітальнага будаўніцтва Менгарвыканкаму заявіў, што яго зямлю і дом ужо адабралі.
«Яны адабралі без майго подпісу, і атрымліваецца, што я тут знаходжуся нелегальна».
«Цяпер я б’юся як рыба аб лёд»
Веслаў зьвярнуўся таксама ў кампанію «Дана Астра», каб паглядзець, колькі ў іх каштуе жыльлё. Яму прапанавалі двухпакаёўку, «голыя сьцены», безь перагародак, электрыкі і сантэхнікі за 80 тысяч эўра.
«Я спытаў, а хто будзе ставіць перагародкі і ўсё праводзіць? Яны сказалі, што могуць яны і мінімальна гэта будзе каштаваць яшчэ 20 тысяч эўра, — кажа Веслаў. — Я ведаў, што ў іх акцыя з растэрміноўкай. Мэнэджар налічыў, што па акцыі будзе 120 тысяч эўра, бо растэрміноўка 20%. Макей казаў, што яны, маўляў, ільготна прадаюць гэта жыльлё. Дык вось гэта і ёсьць ільгота. Яны для лекараў прапанавалі 10-гадовую растэрміноўку на 20%. То бок 20% усё роўна ім вяртаецца. Дык якая гэта ільгота? Гэта ўсё хітра зроблена».
Веслаў Меданоўскі кажа, што не зьбіраецца пакідаць свой дом.
«Цяпер я б’юся як рыба аб лёд. Як сказаў юрыст Менгарвыканкаму, мы прыедзем з АМАПам і вывезем усю вашу мэблю на склад. І дом зьнясуць. Я хацеў вырашыць гэта пытаньне мірна. У мяне цэлыя тамы перапіскі з уладнымі структурамі, — кажа Веслаў. — Але ўсё, я думаю, упіраецца ў грошы, бо ў нас зямлю адбяруць і прададуць яе. Няхай з АМАПам прыяжджаюць і выносяць рэчы».
Што за будоўля?
«Дана Холдынгз» кантралюецца сэрбскімі мільянэрамі Карычамі. У сьнежні мінулага году Эўразьвяз увёў санкцыі супраць гэтага холдынгу, уладальнікі якога, паводле афіцыйнага часопіса Эўразьвяза, падтрымліваюць цесныя адносіны з Аляксандрам Лукашэнкам. Аўтары згаданага артыкула сьцьвярджаюць, што нявестка кіраўніка Беларусі Лілія Лукашэнка займала пасаду ў кампаніі. «Дана Астра», якая ўваходзіць у «Дана Холдынгз», зьяўляецца заказчыкам будаўніцтва шматфункцыянальнага жылога комплексу Minsk World на месцы былога аэрадрома «Менск-1», на плошчы амаль 340 га. Тут плянуецца ўзьвесьці 3 млн квадратных мэтраў жытла, сярод іншага і катэджы.
Пад будоўлю Менгарвыканкам павінен зачысьціць тэрыторыю ад прыватнага сэктару на вуліцах Аэрадромнай, Вільямса, у завулку Вільямса і яшчэ некалькіх суседніх вуліцах, жыхары якіх зьвярталіся да Лукашэнкі з просьбай захаваць іх дамы. Аднак, нягледзячы на пратэсты, будоўлю распачалі. Некаторыя жыхары зьехалі, іх дамы зьнесьлі.
