Суд Маскоўскага раёну Менску вынес вырак журналістцы парталу Tut.by Кацярыне Барысевіч і лекару Арцёму Сарокіну. Журналістка пакараная 6 месяцамі пазбаўленьня волі і штрафам у 2900 рублёў (больш за тры месяцы зьняволеньня да суду залічаць у адбываньне пакараньня), лекар асуджаны на 2 гады пазбаўленьня волі з адтэрміноўкай на год і штрафам 1450 рублёў. Абаім падсудным не забаранілі займацца прафэсійнай дзейнасьцю.
Сарокіна вызвалілі ў залі суду.
Вырак, які вынесла судзьдзя Сьвятлана Бандарэнка, яшчэ не набыў законнай моцы і можа быць абскарджаны ў гарадзкім судзе Менску. Дзяржабвінаваўцай на працэсе выступіла Людміла Іваненка. Сарокін вызвалены, Барысевіч чакае накіраваньня ў калёнію
Адвакаты Кацярыны Барысевіч Міхаіл Баднарчук і Андрэй Мачалаў, а таксама абаронца Арцёма Сарокіна Вольга Бацюк паведамілі, што зьбіраюцца абскарджваць прысуд.
На абвяшчэньне выраку пусьцілі толькі каля 10 чалавек — сваякоў падсудных і пяць працаўнікоў дзяржаўнай прэсы. Перад заляй паседжаньняў паставілі мэталашукальнік. У будынак ня мог трапіць родны брат Барысевіч.
Напярэдадні суд Маскоўскага раёну адмовіў у акрэдытацыі на абвяшчэньне прысуду журналісту Tut.by — спаслаўся на «неспрыяльную эпідэмічную абстаноўку». Адмовілі ў прысутнасьці і журналістам незалежных выданьняў Onliner.by і БелаПАН.
У чым вінавацяць журналістку і лекара
Працэс у справе журналісткі парталу Tut.by Кацярыны Барысевіч і лекара-анэстэзіёляга БХМД Арцёма Сарокіна пачаўся 19 лютага і праходзіў у закрытым рэжыме. Абвінавачаныя і іх адвакаты хадайнічалі аб галосным разглядзе справы, аднак іхныя хадайніцтвы адхілілі. Усе сьведкі і абаронцы далі падпіску аб невыдаваньні, таму невядома нават, якога пакараньня абвінавачваным прасіла пракурор Іваненка.
Барысевіч і Сарокіна вінавацяць у разгалошваньні мэдычнай таямніцы забітага актывіста Рамана Бандарэнкі, які загінуў ад рук невядомых. Ён памёр у шпіталі хуткай дапамогі, куды яго даставілі з Цэнтральнага РУУС Менску.
Абвінавачаная журналістка са спасылкай на інфармацыю, атрыманую ад лекара, апублікавала артыкул пра тое, што ў крыві загінулага Бандарэнкі не было алькаголю, як пра тое публічна казаў Лукашэнка.
Артыкул Крымінальнага кодэксу, паводле якога абвінавацілі доктара і журналістку, прадугледжвае пакараньне ад 6 месяцаў да 3 гадоў пазбаўленьня волі. Праваабаронцы прызналі абаіх палітзьняволенымі.
Сястра Рамана Бандарэнкі, якая выступіла ў судзе ў якасьці сьведкі, падкрэсьлівае, што асабіста дазволіла Барысевіч публікаваць інфармацыю пра стан яе брата.
Каго дапусьцілі ў судовую залю
Судзьдзя Бандарэнка пастанавіла зрабіць працэс закрытым ужо праз паўгадзіны пасьля яго пачатку. Прычынай стала тая ж мэдычная таямніца пра стан Рамана Бандарэнкі неўзабаве пасьля інцыдэнту на «плошчы Перамен», якую, па вэрсіі абвінавачваньня, абнародавалі Арцём Сарокін і Кацярына Барысевіч. У залі суду засталіся толькі адвакаты, абвінавачаныя і судзьдзя з пракурорам і сакратаркай.
Крымінальную справу па факце сьмерці Рамана Бандарэнкі завялі праз 100 дзён пасьля забойства, амаль адначасова з пачаткам працэсу супраць Сарокіна і Барысевіч, але падрабязнасьцяў грамадзтву дасюль не паказалі. Вядома толькі, што сілавікоў сярод падазраваных няма.
Як сустрэлі вырак
Што трэба ведаць пра асуджаных
Кацярыну Барысевіч і Арцёма Сарокіна затрымалі ўвечары 19 лістапада 2020 году, праз шэсьць дзён пасьля публікацыі артыкула Кацярыны Барысевіч, дзе са спасылкай на мэдычныя дакумэнты і лекараў гаварылася пра адсутнасьць алькаголю ў крыві забітага Рамана Бандарэнкі. Гэта цалкам абвяргала паведамленьне МУС пра тое, што Бандарэнка ў момант сьмерці быў п’яны.
Арцёму Сарокіну 37 гадоў. Ён працаваў у тую ноч, калі ў лякарню хуткай мэдычнай дапамогі прывезьлі пабітага Рамана Бандарэнку, і менавіта ён аглядаў пацярпелага. Пазьней у размове з Барысевіч Сарокін паведаміў, што ў крыві Бандарэнкі не было знойдзена этанолу. Сарокін жанаты, мае траіх малалетніх дзяцей.
Кацярыне Барысевіч 36, яна працуе ў журналістыцы ўжо 15 гадоў. Адна гадуе дачку Дар’ю, якой на пачатку студзеня 2021 году споўнілася 18. Летась Дар’я паступіла на журфак БДУ, нядаўна пасьпяхова здала першую сэсію.
Што вядома пра сьмерць Рамана Бандарэнкі
- Невядомыя ў масках пачалі зразаць бел-чырвона-белыя стужкі ў двары на вуліцы Чарвякова ўвечары 11 лістапада.
- Пасьля вэрбальнага канфлікту зь мясцовымі жыхарамі невядомыя пачалі нападаць і біць жыхароў. Каля 22:16 некалькі чалавек забралі і зьвезьлі на бусах, падобных да тых, якімі карыстаюцца сілавікі.
- Паводле непацьверджанай інфармацыі, каля 1,5 гадзіны Бандарэнка знаходзіўся ў Цэнтральным РУУС Менску.
- У 0:05 Раман Бандарэнка паступіў у лякарню хуткай мэдычнай дапамогі зь вялікім ацёкам мозгу, закрытай чэрапна-мазгавой траўмай, субдуральнымі гематомамі, ударамі, абдзірынамі.
- Паводле лекараў, ён быў у затарможаным стане, але ў апэрацыйную яго ўжо прывезьлі ў коме. Апэрацыя цягнулася некалькі гадзін.
- Раман быў у крытычным стане.
- ГУУС Менгарвыканкаму сьцьвярджае, што міліцыя прыбыла на месца толькі пасьля здарэньня. Рамана знайшлі непрытомнага і выклікалі хуткую. Адзін са сьведак здарэньня расказаў Свабодзе, што міліцыя прыяжджала яшчэ тады, калі невядомыя зразалі стужкі, «аднак хутка зьехала, нічога не зрабіўшы».
- Сьледчы камітэт заявіў, што мужчына быў пʼяны. Аднак мэдыкі гэтую заяву абверглі — у крыві Бандарэнкі алькаголю не было.
- 19 лістапада затрымалі журналістку Tut.by Кацярыну Барысевіч і лекара Арцёма Сарокіна. Кацярына Барысевіч была аўтаркай артыкула, дзе гаварылася, што ў крыві загінулага Рамана Бандарэнкі не было алькаголю. Інфармацыю пра гэта ёй перадаў лекар Арцём Сарокін. Пачатак суду над імі прызначаны на 19 лютага.
- 18 лютага 2021 году, на соты дзень пасьля сьмерці Рамана, Генпракуратура паведаміла яго маці Алене Бандарэнцы, што па факце сьмерці яе сына пачалі крымінальную справу.
- 17 верасьня 2021 справу прыпынілі«з прычыны неўстанаўленьня асобы, якая падлягае прыцягненьню ў якасьці абвінавачанага».
