29 студзеня Сьледчы камітэт РФ завочна прад’явіў кіраўніку рэгіянальных штабоў Навальнага абвінавачаньні паводле артыкулу аб уцягваньні непаўналетніх ва ўдзел у несанкцыянаванай акцыі. Максымальнае пакараньне паводле гэтага артыкулу — пазбаўленьне волі на тэрмін да трох гадоў.
Учора Басманны суд Масквы завочна арыштаваў Леаніда Волкава на два месяцы і абвясьціў яго ў міждзяржаўны вышук. Гэта азначае, што весьці яго пошукі будуць на тэрыторыі СНД, у якую Літва ніколі не ўваходзіла.
Кіраўнік МУС Літвы Агне Білатайтэ асудзіла «выкарыстаньне міжнародных інструмэнтаў для палітычна матываванага перасьледу». Кіраўнік МЗС Літвы Габрыелюс Ландсбергіс у сваю чаргу сказаў, што выкарыстаньне інструмэнту міжнароднага вышуку супраць апазыцыі дыскрэдытуе ўдзел Расеі ў Інтэрполе.
Па вэрсіі сьледзтва, Волкаў заклікаў падлеткаў удзельнічаць у акцыі пратэсту ў падтрымку Навальнага, якая прайшла 23 студзеня. Волкаў адмаўляе віну.
Масавыя акцыі за вызваленьне Навальнага, які знаходзіцца ў СІЗА, прайшлі ў многіх гарадох Расеі 23 і 31 студзеня і 2 лютага. Па ўсёй краіне затрымалі больш за 11 тысяч іх удзельнікаў, сотні людзей дагэтуль знаходзяцца пад адміністрацыйным арыштам. Некалькі паплечнікаў Навальнага зьмясьцілі пад хатні арышт. Праваабарончы цэнтар «Мэмарыял» прызнаў іх палітвязьнямі.
