Журналістак абвінавачваюць у «арганізацыі дзеяньняў, якія груба парушаюць грамадзкі парадак». Ім пагражае да 3 гадоў турэмнага зьняволеньня.
«Злучаныя Штаты, краіны-партнэры і праваабарончыя арганізацыі па ўсім сьвеце лічаць гэтыя абвінавачваньні абуральнымі — журналісткі асьвятлялі разьвіцьцё падзеяў. ЗША заклікаюць беларускія ўлады вызваліць іх неадкладна і безумоўна, а таксама ў больш шырокім кантэксьце спыніць перасьлед журналістаў, якія робяць сваю працу», — гаворыцца ў заяве, апублікаванай на сайце дыппрадстаўніцтва.
15 лістапада Кацярыну Андрэеву і Дар’ю Чульцову затрымалі пасьля жывой трансьляцыі і асьвятленьня гвалтоўнага разгону мірных пратэстоўцаў на «плошчы Пераменаў» у Менску. Тады людзі сабраліся, каб ушанаваць памяць Рамана Бандарэнкі. Актывіста і мастака схапілі і пабілі 11 лістапада, ён памёр на наступны дзень у шпіталі.
«Справа супраць журналістак зьяўляецца адным з мноства прыкладаў, якія дэманструюць працяг палітычна матываваных маніпуляцый законам з боку ўладаў дзеля таго, каб прымусіць СМІ замоўкнуць. Моцныя і незалежныя мэдыя, доступ да інфармацыі ёсьць неабходнай умовай вяршэнства закону і надзвычай важныя для пасьпяховасьці адкрытага, сучаснага грамадзтва», — падкрэсьліваецца ў дакумэнце.
