Міжведамасная камісія Ўкраіны ў пытаньнях міжнароднага гандлю абвясьціла аб пачатку антыдэмпінгавага расьсьледаваньня паставак цеплаізаляцыйных матэрыялаў зь Беларусі і Расеі.
Прадметам вывучэньня вызначылі цеплаізаляцыйныя матэрыялы, якія ў замежнаэканамічнай дзейнасьці кваліфікуюцца кодам ех 6806 10 00 00: шклавата, мінэральная сылікатная вата і аналягічныя віды мінэральнай ваты, за выключэньнем іх сумесяў.
Са скаргай, што Беларусь і Расея пастаўляюць ва Ўкраіну адпаведную прадукцыю па дэмпінгавых цэнах, у камісію зьвярнулася ўкраінскае прадпрыемства «ОБІО». Гэта прыватнае прадпрыемства, якое знаходзіцца ў Жытоміры і займаецца вытворчасьцю немэталічнай мінэральнай прадукцыі.
Камісія ўгледзела ў скарзе дастаткова абгрунтаваных доказаў, каб папярэдне прыйсьці да высновы, што пастаўкі цеплаізаляцыйных матэрыялаў зь Беларусі і Расеі ажыцьцяўляюцца па такіх цэнах і ў такіх аб’ёмах, што могуць нашкодзіць нацыянальнаму вытворцу аналягічнай прадукцыі.
Цягам месяца Міністэрства разьвіцьця эканомікі, гандлю і сельскай гаспадаркі Ўкраіны зарэгіструе ўсе зацікаўленыя ў расьсьледаваньні бакі, якія цягам 60 дзён могуць накіраваць свае камэнтары наконт прадмету разгляду.
У Беларусі вытворчасьцю цеплаізаляцыйных матэрыялаў займаюцца некалькі невялікіх прыватных прадпрыемстваў, а таксама дзяржаўныя — ААТ «Полацк-Шкловалакно», горадзенскі шклозавод «Нёман», ААТ «Гомельбудматэрыялы» і іншыя.
Паводле афіцыйнай статыстыкі Ўкраіны, Беларусь зьяўляецца лідэрам у аб’ёмах паставак цеплаізаляцыйных матэрыялаў сярод усіх гандлёвых партнэраў Украіны. На другім месцы — пастаўшчыкі з Расеі. Толькі за апошнія тры месяцы Ўкраіна купіла ў Беларусі 4,675 тысячы тонаў гэтай прадукцыі на 1,8 мільёна даляраў.
Што ўжо знаходзіцца пад украінскім антыдэмпінгам
- Сёлета ў траўні Ўкраіна абмежавала пастаўкі беларускіх запалак на ўкраінскі рынак антыдэмпінгавым мытам памерам 21,32%.
- З 26 сакавіка набыло моц рашэньне Ўкраіны аб увядзеньні антыдэмпінгавага мыта на пастаўкі зь Беларусі будаўнічых блёкаў зь цеплаізаляцыйнага бэтону памерам 34,19% ад мытнай вартасьці прадукцыі.
- 1 лютага 2019 году міжведамасная камісія міжнароднага гандлю канчаткова ўвяла абмежаваньні паставак прадукцыі Берасьцейскага электралямпавага заводу на пяць гадоў (да 2 сакавіка 2023 году).
- У траўні 2019 году Ўкраіна на пяць гадоў абмежавала пастаўкі зь Беларусі цэмэнтных клінкераў і портляндцэмэнту мытам у памеры 57,03%.
- Кампрамісным стала рашэньне міжведамаснай камісіі наконт паставак ва Ўкраіну прадукцыі «Мазырсолі» — кампанія ня будзе выплачваць антыдэмпінгавага збору, але мусіць прытрымлівацца пэўных цэнавых абавязаньняў.
- Сёлета ў чэрвені Міністэрства разьвіцьця эканомікі, гандлю і сельскай гаспадаркі Ўкраіны ў інтарэсах пяці нацыянальных вытворцаў пачало антыдэмпінгавае расьсьледаваньне аб пастаўках фанэры зь Беларусі.
