Як паведаміла прэс-сакратарка Лукашэнкі Натальля Эйсмант, ён з самай раніцы быў у Палацы Незалежнасьці, «кантраляваў абстаноўку», піша БелТА.
Бліжэй да вечара, як кажа Эйсмант, «калі так званыя мітынгоўцы пайшлі, можна сказаць, на своеасаблівы штурм будынку», Лукашэнка таксама знаходзіўся ў Палацы. Потым выклікаў верталёт і абляцеў горад.
«Вярнуўшыся неўзабаве ў Палац Незалежнасьці, перш за ўсё прэзыдэнт падзякаваў хлопцам — тым, хто абараняў Палац па пэрымэтры. Таксама падышоў і да хлопцаў з АМАПу, пагутарыў зь імі, падзякаваў і ім», — сказала Эйсмант.
«Мы да канца! Мы з вамі да канца!» — закрычалі яму ў адказ АМАПаўцы.
«Мы зь імі разьбяромся», — дадаў Лукашэнка.
«Як і абяцаў прэзыдэнт, ён нікуды ня ўцёк, як бы ні спрабавалі гэта прадставіць асобныя блогеры і тэлеграм-каналы. І дзеці яго таксама былі зь ім. На кадрах можна ўбачыць яго малодшага сына», — дадала прэс-сакратарка.
