У Менск звозяць людзей на мітынг у падтрымку Аляксандра Лукашэнкі. Ён прызначаны апоўдні каля Дому ўраду. Празь дзьве гадзіны там жа зьбіраюцца прыхільнікі пераменаў.
Як паведамляюць чытачы Свабоды і парталу Tut.by, пасажыры аўтобусаў з калёнаў, камусьці прапанавалі прэміі і адгулы, некаму прыгразілі ў выпадку адмовы звальненьнем і пазбаўленьнем месцаў у інтэрнатах. Зафіксавалі сотні падобных скаргаў.
Зь некаторых гарадоў нават пусьцілі адмысловыя цягнікі, каб даставіць масоўку. Да прыкладу, зь Берасьця ў Менск заплянаванае прыбыцьцё саставу зь 19 вагонамі.
Як паведамілі чытачы Свабоды, а 6-й раніцы на сталіцу выправілася аўтобусная калёна зь Віцебску, яе суправаджае эскорт ДАІ. Бюджэтнікі наракаюць, што ў ход ідуць самыя «брудныя» мэтады шантажу супраць тых, хто спрабаваў адмовіцца.
