«Я спыняю галадоўку, — паведаміла Вольга Каракіна Радыё Свабода. — Мне страшна за людзей, якія прыходзяць мяне падтрымаць. Цяпер хапаюць усіх, не хачу, каб яны пацярпелі».
Вольга Каракіна, дзяўчына палітзьняволенага Зьмітра Фурманава, з 26 ліпеня трымае галадоўку каля турмы на Валадарцы. Яна сказала, што сёньня міліцыянты папярэдзілі яе, што гэта «несанкцыянаванае масавае мерапрыемства».
«Падышлі, сказалі, што мы вельмі доўга тут знаходзімся і што калі мы ня пойдзем адсюль, то супраць нас пачнуць адміністрацыйны працэс», — расказала Вольга Радыё Свабода.
Галадоўку пачыналі разам з маці Зьмітра Фурманава. Той падчас галадоўкі выклікалі хуткую дапамогу, кажа Вольга, і дактары забаранілі ёй працягваць галадаваць. 30 ліпеня маці спыніла галадоўку і вярнулася ў Горадню.
Вольгу ўвесь гэты час падтрымлівалі неабыякавыя людзі, якія і цяпер знаходзяцца разам зь ёй.
«Проста добрыя людзі, я іх раней ня ведала, — кажа Вольга. — Цяпер тут 4 чалавекі, і я не хачу, каб зь імі нешта здарылася».
29 ліпеня стала вядома, што Зьмітра Фурманава перавялі зь СІЗА на Валадарцы ў СІЗА ў Жодзіна.
Зьмітра Фурманава затрымалі 29 траўня ў Горадні. Яго забралі проста зь пікету, дзе быў затрыманы і Сяргей Ціханоўскі. Зьмітра схапілі людзі ў цывільным і вынесьлі разам з крэслам з-за стала, дзе Зьміцер зьбіраў подпісы за Сьвятлану Ціханоўскую. Забралі на вачах бацькоў і дзяўчыны Вольгі. Некалькі маладзёнаў закінулі яго ў сіні мікрааўтобус і павезьлі ў Менск. З 30 траўня па 28 ліпеня Зьміцер Фурманаў утрымліваўся ў менскім СІЗА №1.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
