Гурт Naviband самаізаляваўся на хутары Вайцюшкі ў Горадзенскай вобласьці. Пра тое, як яны паляць у каміне, сустракаюць захады на Нёмане і за што жывуць без канцэртаў, Арцём Лук’яненка расказаў Свабодзе.
Каранавірус у Беларусі і ў сьвеце. Як разьвіваюцца падзеі >>
Музыкі жывуць у ізаляцыі амаль месяц
Удзельнікі «Эўравізіі-2017» Арцём Лук’яненка і Ксенія Жук разам з сынам Мацеем жывуць у ізаляцыі амаль месяц. Яны паехалі да свайго сябра, сьпевака Зьміцера Вайцюшкевіча, у госьці на некалькі дзён і засталіся дагэтуль. Музыкі ўпершыню так доўга затрымаліся на адным месцы.
«Як казала мая маці: „Сядзі, пакуль ня пойдзеш“», — пераказвае Арцём словы Вайцюшкевіча, калі яны сабраліся вяртацца ў Менск.
Хутар Вайцюшкі месьціцца ў лесе на беразе Нёмана. Да найбліжэйшай вёскі — 2 кілямэтры, да невялікага гарадка Бярозаўка — 10. Хутар вядомы сваімі музычнымі фэстывалямі, літаратурнымі чытаньнямі і канцэнтрацыяй творчых людзей. Зьміцер Вайцюшкевіч жыве тут разам зь сям’ёй.
«Нас тут вялікая сям’я: дзеці Зьмітра, наш сын. Мы тут вельмі крута бавім час. У нас тут фізычная праца і духоўная, пішам песьні. Гэта такая перазагрузка, нам нават падабаецца», — кажа Арцём.
Арцём і Ксенія вырашылі застацца ў ізаляцыі зь некалькіх прычын. Найпершая — клопат пра сваё здароўе. Арцём, бадай што, самы ўразьлівы да каранавірусу зь сям’і, бо мае бранхіяльную астму.
«Мне цяпер гэта зусім недарэчы. Наколькі ведаю, каранавірус дае ўскладненьне на лёгкія», — тлумачыць сьпявак.
Да таго ж, неабходнасьці заставацца ў Менску цяпер няма з прычыны адсутнасьці жывых канцэртаў. У Вайцюшках ёсьць студыя, дзе можна зрабіць якасныя запісы песьняў.
Гэты час на хутары, прызнаецца Арцём, прынёс каштоўныя рэчы ў іхнае існаваньне.
«Адчуваць жыцьцё»
Сям’я жыве ў асобным гасьцявым доміку. Яны прачынаюцца, як і раней, у залежнасьці ад сына Мацея, — у 7-8 гадзін ранку. Першай справай Арцём коле дровы і паліць у каміне, інакш дома холадна. Ксюша ідзе на мэдытацыю, а Арцём з малым гатуюць просты сьняданак і вараць каву. Пасьля сьняданку — шпацыр па лесе каля 5 кілямэтраў. Сустракаюць казуляў, ласёў, зайцоў.
Арцём пачаў выкладаць сторыз у Instagram, дзе расказвае пра штодзённае жыцьцё ў Вайцюшках.
Пасьля прагулкі надыходзіць самая важная частка дня — некалькі гадзін музычных рэпэтыцый. Ксюша грае на разладжаным піяніна ў старэнькай альтанцы, Арцём можа «хоць на елку з гітарай залезьці». Перавага хутару — шмат прасторы, можна разысьціся па розных кутах і не перашкаджаць адно аднаму. Яны напісалі тут новую песьню, працуюць над кліпам на песьню з апошняга альбома.
«Ёсьць шмат месца, куды можна схавацца, запісаць, штосьці прыдумаць. Натхняльная такая ў нас сытуацыя. Мы размаўлялі пра тое, што невядома, калі такое магло адбыцца, каб мы на такі вялікі час змаглі сабрацца разам, весьці філязофскія размовы, пісаць песьні і адчуваць жыцьцё цяпер», — распавядае музыка.
Абед. Побач у вёсках можна набываць якасныя натуральныя прадукты па добрай цане: яйкі, мёд, віно, хлеб.
«Шмат чаго самі робім. Тут ужо крапіва пачала расьці. Некалькі дзён таму мы рабілі суп з крапівы, вельмі смачны. Тут у нас кулінарныя экспэрымэнты: часу хапае, і мы прыдумваем нешта цікавае», — кажа Арцём.
«Мы адчуваем сілу ад Нёмана»
Другая палова дня — для фізычнай працы. Мужчыны гаспадараць на падворку, нешта сякуць, пілуюць, пераносяць. Жанчыны займаюцца гародам.
«Я ж не мянчук, я з Глыбокага. У Менску жыву 9 гадоў. Дагэтуль дапамагаў бацьку і дзеду ў працы. Я разумею, што такое жыць у вёсцы», — запэўнівае Арцём.
Ён лічыць, што для кожнага важна працаваць фізычна. Тады галава адпачывае.
«Падчас фізычнай працы можа прыйсьці важная думка. Я заўсёды трымаю побач дыктафон, каб штосьці занатаваць. Тут заўсёды прыходзяць ідэі, вельмі шмат: проста радкоў або ідэй відэа, інтэрнэт-руху, мэлёдыі», — расказвае суразмоўца.
Інтэрнэт на хутары слаба цягне, таму музыкі, каб злавіць лепшы інтэрнэт, едуць за 10 кілямэтраў у Бярозаўку. Навінаў чытаюць вобмаль, але ведаюць агульную сытуацыю з каранавірусам у краіне.
Увечары зноў гуляюць у лесе — у другі бок да Нёмана, таксама каля 5 кілямэтраў. Ладзяць невялікі пікнік. Потым ідуць у лазьню або на рыбу, або ў госьці да суседзяў. Арцём і Зьміцер ужо некалькі разоў купаліся ў Нёмане.
«Мы адчуваем сілу ад Нёмана, — кажа суразмоўца. — Абавязкова зорнае неба і захады. Гэта абавязковая частка — хадзіць сузіраць захад. Кожны раз над Нёманам — гэта розная гісторыя».
Пасьля вялікай агульнай вячэры ў хаце насельнікі Вайцюшкоў граюць у настольныя гульні кшталту «Манаполіі» або «Тысячы». Чытаюць кнігі, глядзяць дакумэнтальныя фільмы. Уключаюць разам зь дзецьмі «Гары Потэра» або «Валадара пярсьцёнкаў», п’юць гарбату, запальваюць камін.
Мацей, якому неўзабаве споўніцца 2 гады, таксама атрымлівае асалоду ад карантыну: ён шмат сьпіць на сьвежым паветры, бавіцца на вуліцы, пасябраваў зь дзецьмі Зьмітра.
«Ня ты адзін такі, а ўвесь сьвет»
Цяпер гурт жыве за ашчаджэньні, таксама за даход ад продажу лічбавага прадукту на розных інтэрнэт-плятформах. На хутары яны трацяць няшмат грошай.
Арцём прызнае, што сапраўды асноўны даход — гэта канцэрты і карпаратывы. Цяпер гэтага пазбаўленыя музыкі па ўсім сьвеце.
Як выйсьце, Арцём прапануе ладзіць онлайн-канцэрты ў добрай якасьці за ахвяраваньні або нават набываць на іх квіткі. Naviband і Зьміцер Вайцюшкевіч ужо выступалі з хатнімі канцэртамі падчас ізаляцыі.
Фрагмэнт канцэрту:
Падтрымаць музыкантаў могуць радыёстанцыі, калі будуць ставіць больш беларускай музыкі, лічыць удзельнік гурту. Да таго ж, каб утрымліваць сябе, артысты могуць цяпер больш супрацоўнічаць з буйнымі брэндамі, напрыклад здымацца ў рэкляме для іх.
«Я ня ведаю, дакуль гэта дойдзе. Не ўяўляю, як музыкам можа быць складана. Усе ў гэтым становішчы. Гэтая думка крыху можа падтрымаць. Ня ты адзін такі, а ўвесь сьвет», — мяркуе Арцём.
Пакуль яны не адмяняюць свайго ўдзелу ў буйных фэстах, заплянаваных сёлета на жнівень-верасень. Спадзяюцца, што да таго часу сытуацыя палепшыцца.
«Жыць тут і цяпер»
Арцём кажа, што падчас карантыну пацьвердзіў ранейшыя свае важныя думкі.
«Сям’я, блізкія людзі — гэта галоўнае, што ў цябе ёсьць».
«Жыць тут і цяпер вельмі важна. Калі ты будзеш адчуваць жыцьцё ў гэтую хвіліну; адчуваць асалоду, калі выходзіш на сцэну перад тысячнай аўдыторыяй; радавацца, што толькі што назіраў неверагодны захад, або асалоду ад таго, што табе далося распаліць камін і вось-вось стане цёпла. Гэтае адчуваньне „тут і цяпер“ дае штуршок на ўсе твае справы, самыя вялікія і самыя дробныя».
«Чым больш ты будзеш думаць пра добрае, тым больш гэтага будзе ў тваім жыцьці. Як ты глядзіш на сьвет, такое тваё жыцьцё».
«Час, які трэба выкарыстоўваць»
Арцём з удзячнасьцю кажа пра гэты час. Кажа, што яны з Ксеніяй даўно хочуць купіць свой дамок. Цяпер пара ня ведае, як здолее вярнуцца ў бэтонны горад.
«Мы заўсёды ў гастролях або ў працы над песьнямі. Каб проста спыніцца на такі пэрыяд і адчуць так жыцьцё, адчуць задавальненьне ад ракі, захаду, зорнага неба, сьвежага паветра так працягла... Даўно мы не адчувалі гэтага», — дзеліцца Арцём.
Колькі працягнецца асабісты карантын, Naviband ня ведаюць. Магчыма, пакуль не пачнуцца канцэрты.
«Я проста ня думаю пра гэта [вяртаньне ў Менск]. Мы тут і цяпер. Час па-іншаму ўспрымаецца», — тлумачыць музыка.
Арцём і Ксенія адносяць сябе да тых людзей, якія асьцерагаюцца каранавірусу, лічаць вартым абараняцца. У іх ёсьць шмат знаёмых лекараў, якія раяць заставацца дома. Самае страшнае, лічыць Арцём, — гэта заставацца абыякавым у такой сытуацыі
«Па-першае, ты абараняеш сябе. Па-другое, ты выказваеш павагу да ўсіх астатніх людзей. Мы ж бачым прыклад іншых краінаў. Таму нельга быць абыякавым», — упэўнены ён.
Арцём уражаны, як рэагуе маленькая Бярозаўка на пандэмію: ва ўсіх крамах антысэптыкі, людзі трымаюць дыстанцыю ў чарзе, многія ходзяць у масках і пальчатках.
«Трэба перачакаць. Тое, што адбываецца, дае людзям магчымасьць нармальна паразмаўляць адно з адным, пачытаць, паслухаць музыку, нешта прыдумаць, пабыць зь сям’ёй. Гэта час, які трэба выкарыстоўваць», — упэўнены сьпявак.