17 красавіка зьявілася статыстыка хворых на COVID-19 у Докшыцкім раёне — першы раз за апошнія 9 дзён улады расказалі пра маштаб эпідэміі. Праз тыдзень пасьля першай паездкі ў Докшыцы Свабода сабрала інфармацыю ад мясцовых жыхароў пра тое, што там зьмянілася за гэты час.
Каранавірус у Беларусі і ў сьвеце. Як разьвіваюцца падзеі >>
Колькі цяпер хворых на COVID-19 у Докшыцах?
Паводле Міхаіла Вішнявецкага, начальніка галоўнага ўпраўленьня аховы здароўя Віцебскага аблвыканкаму, у Докшыцкім раёне пацьверджаныя 72 пацыенты з каранавірусам. Пра гэта напісала БелТА.
На мінулым тыдні колькасьць інфікаваных каранавірусам была вядомая толькі прыблізна. Загадчыца паліклінікі ў Докшыцах 8 красавіка казала газэце «Родныя вытокі», што выпадкі каранавірусу ў Докшыцах «можна пералічыць па пальцах».
Прадстаўнікі якіх установаў захварэлі на каранавірус ці пнэўманію
Пра маштаб эпідэміі таксама можна меркаваць па тым, у колькіх дзяржаўных установах выявілі хворых на COVID-19 і пнэўманію.
Ад сваякоў і калегаў нам вядомыя прынамсі наступныя арганізацыі, дзе ёсьць шпіталізаваныя супрацоўнікі з пацьверджаным каранавірусам альбо пнэўманіяй:
- аддзел адукацыі Докшыцкага райвыканкаму;
- раённае ўпраўленьне ўнутраных спраў;
- прадпрыемства жыльлёва-камунальнай гаспадаркі «Докшыцы-камунальнік»;
- цэнтар гігіены і эпідэміялёгіі;
- Белтэлекам
- Рыма-каталіцкі касьцёл;
- цэнтральны раённы шпіталь.
9 чалавек памерлі ад пнэўманіі за два тыдні
За два мінулыя тыдні ў Докшыцах памерлі прынамсі дзевяць чалавек, у каго была пнэўманія. Тры зь іх — на гэтым тыдні. Гэтую інфармацыю рэдакцыі пацьвердзілі сваякі і знаёмыя гэтых людзей. Наколькі цяпер вядома, каранавірус у ніводнага зь іх не зафіксавалі.
Пацыентка шпіталя: «У нас тут лязарэт, мэдыкі працуюць, як на вайне»
Пра тое, як цяпер працуе раённы шпіталь, у інтэрвію раённай газэце расказаў старшыня райвыканкаму. Паводле Алега Кавалёнка, цэнтральную раённую лякарню часова перапрафілявалі пад тэрапэўтычнае аддзяленьне. Хірургія, дзіцячае і радзільнае аддзяленьні, гінэкалёгію перавялі ў лякарню суседняга гораду — Глыбокага.
Больш эмацыйна пра сытуацыю ў шпіталі Свабодзе расказала адна з пацыентак, зь якой мы размаўлялі праз тэлефон. Як і большасьць пацыентаў, жанчына ляжала ў лякарні з запаленьнем лёгкіх.
«У нас жа тут лязарэт, і яны [мэдыкі] працуюць, як на вайне, — дзень і ноч. Апякуюцца над намі. Вось хто героі», — сказала спадарыня Валянціна.
Нам не ўдалося зьвязацца зь ніводным мэдыкам з Докшыцкага раёну. Іх сваякі расказваюць, што дактары і мэдсёстры падпісалі дакумэнт, паводле якога ім забараняецца паведамляць любую інфармацыю пра стан рэчаў у шпіталі.
Масавыя мерапрыемствы забаранілі, прыватныя крамы зачыніліся
Афіцыйна карантын у Беларусі ня ўводзілі, існуе толькі рэкамэндацыя пазьбягаць масавых мерапрыемстваў. Але ў Докшыцкім раёне масавыя мерапрыемствы ўвогуле забароненыя. Пра гэта сказаў Алег Кавалёнак у інтэрвію раённай газэце. Таксама ў горадзе закрылі рынкі, лазьні і водна-аздараўленчы цэнтар. Адзінокім старым дастаўляюць тавары першай неабходнасьці сацыяльныя работнікі і валянтэры БРСМ і Чырвонага Крыжа. Камбінат бытавога абслугоўваньня і школы гораду шыюць маскі.
Адразу некалькі прыватных крамаў і станцый тэхабслугоўваньня часова закрыліся. Гэта зьвязана і з эпідэміяй, і з тым, што зьменшылася актыўнасьць людзей. Хто мае магчымасьць, стараецца ўвогуле не выходзіць з дому. У той жа час дзяржаўныя арганізацыі і прадпрыемствы працуюць, як і раней — тут няма карантыну.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
