Расея прадугледзела магчымасьць пастаўкі ў Беларусь у II квартале амаль 6 мільёнаў тон нафты

19 сакавік 2020, 20:10

Комплекс «Нафтан-Палімір» у Наваполацаку, ілюстрацыйнае фота

Графік экспарту нафты з Расеі ў другім квартале 2020 году прадугледжвае пастаўку на беларускія нафтаперапрацоўчыя заводы (НПЗ) амаль 6 мільёнаў тон нафты, хоць адпаведных кантрактаў пакуль няма, паведаміла «Інтэрфаксу» крыніца, знаёмая з графікам.

Паводле суразмоўцы агенцтва, нягледзячы на адсутнасьць кантрактаў на пастаўкі нафты з Расеі ў Беларусь, графік прадугледжвае пастаўку

на Мазырскі НПЗ — 2,935 мільёнаў тон (у графіку на I квартал была лічба 3,245 млн тон, годам раней — на 485 тысяч тон менш),
на Нафтан — таксама 2,935 млн тонаў (2,595 тон на I квартал, годам раней — на 935 тысяч тон менш).

ГЛЯДЗІЦЕ ТАКСАМА:

Экспарт нафтапрадуктаў зь Беларусі абваліўся ў студзені амаль на 70%

Фактычныя пастаўкі нафты з Расеі ў студзені — лютым склалі 719 тысяч тон — на 76% менш, чым у студзені — лютым 2019 году.

У цэлым графік экспарту нафты з Расеі ў другім квартале прадугледжвае рост перавалкі амаль ва ўсіх партах і зьніжэньне аб’ёмаў на напрамках у Эўропу.

Расея спыніла пастаўкі нафты ў Беларусь. Што здарылася

1 студзеня 2020 году Расея спыніла пастаўкі нафты ў Беларусь, але расейская нафта працягвае паступаць транзытам празь Беларусь у Эўропу.
Беларусь і Расея дагэтуль не дамовіліся пра пастаўкі нафты ў 2020 годзе, хоць Лукашэнка і Пуцін вялі перамовы 30 і 31 сьнежня.
Прыняты толькі «індыкатыўны балянс»: Расея можа паставіць 24 млн тонаў нафты на год. У 2019-м столькі і паставілі: 18 млн т пайшлі на перапрацоўку, яшчэ 6 млн т на «перамытненьне». Паводле эканаміста Яраслава Раманчука, Беларусі на ўласныя патрэбы хапае 6–7 млн тонаў — астатняе ішло на нафтапрадукты для экспарту або на «перамытненьне».
31 сьнежня 2019 году Лукашэнка даручыў завозіць нафту з партоў Балтыі і залучыць альтэрнатыўныя пастаўкі праз магістральны нафтаправод «Дружба».
Пакуль Мазырскі НПЗ пачаў атрымліваць нафту толькі ад кампаніі расейскага алігарха Гуцэрыева — чакаецца пастаўка ўсяго 750 тысячаў тонаў.
Беларусь дамовілася пра імпарт 80 тонаў нарвэскай нафты Johan Sverdrup з пастаўкай у літоўскі порт Клайпеда. У Беларусі чакаюць пачатку разгрузкі ўвечары 22 студзеня. Перавалка і транспарт да НПЗ чыгункай будуць каштаваць больш за 20 даляраў за тону.
Гатоўнасьць транспартаваць нафту ў Беларусь на пастаяннай аснове ўжо выказалі суседнія Латвія (магчымыя аб’ёмы не абвяшчаліся) і Літва (да 3 млн тонаў на год). Пры чым Літва гатовая дастаўляць і газ. Па стане на 21 студзеня «Белнафтахім» мае «практычна гатовыя кантракты» на альтэрнатыўныя пастаўкі.
Беларускія НПЗ у першай палове студзеня працавалі на леташніх запасах, аб’ёму якіх хапала прыкладна на 20 дзён працы. Экспарт нафтапрадуктаў Беларусь часова прыпыняла ад 1 студзеня, аднавіла ад 21-га.
Паводле неафіцыйных зьвестак «Інтэрфаксу», Беларусь прапанавала рэалізаваць варыянт разавай пастаўкі нафты з рэсурсаў незалежных пастаўшчыкоў з мэтай павелічэньня запасаў сыравіны на НПЗ на час правядзеньня перамоваў.
Публічна ж Лукашэнка 21 студзеня паставіў задачу зьнізіць пастаўкі нафты з Расеі да 30-40% ад неабходных аб’ёмаў: «працэнтаў 30 мы павінны з Балтыкі завозіць і працэнтаў 30 праз Украіну». Пастаўкі з Казахстану, заявіў ён, заблякавала Расея.
Менск і Масква дасюль не ўзгаднілі кампэнсацыю за расейскі падатковы манэўр. У беларускі бюджэт-2020 закладзеныя страты ў памеры 951 млн рублёў.
Расея дагэтуль не кампэнсавала Беларусі страты за пастаўкі бруднай нафты ў красавіку 2019 году — толькі 20 студзеня 2020-га дамовіліся пра падыходы і мэтодыку кампэнсацыі.