Аляксандар Лукашэнка 18 верасьня падпісаў указ № 350 «Аб асаблівасьцях выкарыстаньня нацыянальнага сэгмэнту сеткі інтэрнэт», піша Interfax.by.
Паводле ўказу, грошы ад продажу дамэнаў праз аўкцыён будуць накіроўваць на дабрачынныя рахункі дзіцячых інтэрнатаў і прытулкаў.
Дзяржаўныя органы, суды і натарыюсы змогуць атрымоўваць ад апэратыўна-аналітычнага цэнтру пэрсанальныя дадзеныя ўласьнікаў дамэнаў.
Міністэрства сувязі і інфарматызацыі цяпер можа быць заказчыкам і арганізатарам прац па стварэньню, разьвіцьцю і эксплуатацыі байнэту ў інфармацыйнай сыстэме ЕАЭС. Указ зьмяніў ранейшыя ўказы:
- спрасьцілася працэдура ўзгадненьня стварэньня і рэканструкцыі оптавалакна;
- правайдэрам узмацнілі патрабаваньні, якія абараняюць дзяржаўныя органы і арганізацыі ў Інтэрнэце.
Указ не апублікаваны, калі ён набудзе моц, не ўдакладняецца.
Абноўлена. Указ апублікаваны, адзін з пунктаў у ім робіць адказнымі за інфармацыю, разьмешчаную ў байнэце, ня толькі таго, хто разьмясьціў інфармацыю, а і сайт, на якім яе разьмясьцілі.
