На выезьдзе з акумулятарнага заводу пад Берасьцем 14 жніўня невядомы мужчына зьбіў удзельніцу «сьвінцовай варты» Марыю Галалюк. Жанчына атрымала закрытую чэрапна-мазгавую траўму.
Што адбылося?
Здарэньне адбылося падчас штодзённай варты каля акумулятарнага заводу, сказаў Свабодзе ўдзельнік варты Алесь Абляк. Актывісты правяраюць, што вывозяць у машынах з заводу, будаўніцтва якога прыпынілі.
На відэа бачна, што грузавы МАЗ спрабаваў выехаць з тэрыторыі заводу, дарогу яму перакрыў легкавік актывіста Дзяніса Малышчанкі. Пасьля гэтага кіроўца МАЗ у брэндаваным камбінэзоне кампаніі «Белпрамімпэкс» выйшаў з машыны і сказаў, што груз трэба было глядзець раней.
Прэс-служба групы кампаній 1AK-GROUP сказала Tut.by, што актывісты заблякавалі аўтамабіль, які выяжджаў з тэрыторыі прадпрыемства. Аўто належыць падрадчыка і наймаўся для адгрузкі арэндаванага пагрузчыка. Кіроўца машыны не працуе ў «Ай-Паўэр».
У гэты момант мужчына, які знаходзіўся на прахадной заводу, кудысьці званіў, пасьля ён падышоў да легкавіка і таўхануў люстэрка нагой, улез у машыну і яшчэ раз ударыў па ёй. Пазьней мужчына стаў зьбіваць актывістку Марыю Галалюк.
«Маша яшчэ абуралася: акрамя таго, што пабіў, яшчэ харкануў у твар», – сказаў Малышчанка.
Галалюк цяпер у паліклініцы, у яе дыягнаставалі чэрапна-мазгавую траўму, сказаў Свабодзе праваабаронца Раман Кісьляк.
Вярнуўся на завод і біў па машыне
Пазьней пратэстоўцы супраць заводу паехалі ў берасьцейскі філіял «Белпрамімпэкс», каб паразмаўляць з мужчынам, сказаў Свабодзе Аляксандар Абляк.
На пытаньне, чаму ён зьбіў Галалюк, мужчына адказаў, што яна яго здымала. Пасьля ён пачаў пагражаць актывістам, што знойдзе іх і іх «супакояць».
Пазьней мужчына вярнуўся на акумулятарны завод, напаў на іншага ўдзельніка «сьвінцовай варты» і зламаў яму пераключальнікі ў машыне.
Што кажуць у міліцыі?
У прэс-службе УВД Брэсцкага аблвыканкаму здарэньне не камэнтуюць.
Паводле Кісьляка, пратэстоўцы адразу зьвярнуліся ў 102. Міліцыя прыехала, узяла тлумачэньні ў Малышчанкі. Паводле Кісьляка, пацярпелыя будуць настойваць на завядзеньні крымінальнай справы паводле артыкула 339 «Хуліганства», а таксама зьвяртацца ў Сьледчы камітэт.
Хто біў?
Свабода зьвязалася з гарачай лініяй ААТ «Белпрамімпэкс». Там прызналі, што жанчыну зьбіў іхні супрацоўнік, і папрасілі прабачэньня. Ці будзе мужчына далей працаваць у кампаніі, вырашыць дырэктар прадпрыемства.
«У нас ужо супрацоўнікі паглядзелі гэтае відэа. Сорамна, выбачаемся, што так выйшла», — сказалі на гарачай лініі кампаніі.
Пратэсты супраць акумулятарнага заводу ў Берасьці. Што важна ведаць
- Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
- Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
- Штонядзелі пратэстоўцы выходзілі на цэнтральную плошчу ў Берасьці. Блогераў і актывістаў затрымлівалі, выносілі ім папярэджаньні, штрафавалі і абавязвалі выбачыцца за відэа пра акумулятарны завод.
- Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
- У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
- У верасьні 2018 году на будоўлі заводу выявілі парушэньні пажарнай бясьпекі.
- У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
- 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
- У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
- 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
- 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
- 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.
