Амэрыканская кампанія Boeing страціла тытул найбуйнейшага сусьветнага вытворцы самалётаў, саступіўшы эўрапейскаму канкурэнту Airbus. Гэта адбылося на фоне падзеньня на 37% паставак самалётаў замоўнікам у першым паўгодзьдзі.
У кампаніі 9 ліпеня паведамілі, што адправілі ў першым квартале бягучага году 239 камэрцыйных самалётаў замоўнікам, у той час як Airbus зрабіў 389 паставак за той жа пэрыяд, а гэта на 28% больш, чым за аналягічны пэрыяд мінулага году. Такія лічбы сьведчаць, што пастаўкі самалётаў Boeing сёлета, падобна, адстануць ад Airbus ўпершыню за восем гадоў.
На падзеньне продажаў амэрыканскай авіякампаніі паўплывалі катастрофы двух новых самалётаў Boeing 737 MAX, у якіх агулам загінулі 346 чалавек. Гэта прывяло да далейшага прыпыненьня палётаў лайнэраў гэтай мадыфікацыі, а потым нанесла важкі ўдар па даходах кампаніі. У красавіку Boeing паведаміў, што выдзеліў каля 1 мільярда даляраў на выдаткі, зьвязаныя з прыпыненьнем палётаў усіх самалётаў 737 MАХ, аднак аналітыкі мяркуюць, што гэтая лічба рэзка ўзрасьце.
Фэдэральная авіяцыйная адміністрацыя ЗША на мінулым тыдні выявіла новую праблему з самалётамі Boeing 737 MAX, заблякаваўшы вяртаньне самалёта ў эксплюатацыю як мінімум да канца верасьня.
