Прэзыдэнт Вэнэсуэлы Нікаляс Мадура заклікаў урад краіны пайсьці ў адстаўку для «поўнай рэструктурызацыі» кабінэта міністраў, каб «абараніць радзіму Балівара і Чавэса ад любой пагрозы».
Пра гэта напісала ў твітэры віцэ-прэзыдэнт Вэнэсуэлы Дэлсі Радрыгез. Сам Мадура пакуль не рабіў афіцыйных заяў.
Паводле апублікаваных 17 сакавіка дадзеных сацыялягічнага апытаньня, праведзенага вэнэсуэльскай кампаніяй Meganálisis, амаль 89 адсоткаў жыхароў Вэнэсуэлы выказаліся за тое, каб прэзыдэнт краіны і ўрад сышлі ў адстаўку.
Вэнэсуэла перажывае глыбокі палітычны і эканамічны крызыс. У 2018 годзе паказчык інфляцыі ў краіне перавысіў адзнаку аднаго мільёна адсоткаў, насельніцтва адчувае дэфіцыт харчаваньня і мэдыкамэнтаў. На мінулым тыдні некалькі дзён на большай частцы тэрыторыі краіны не было электрычнасьці з прычыны аварый на электрастанцыях.
Масавыя акцыі пратэсту ў Вэнэсуэле пачаліся ў канцы студзеня — адразу пасьля ўступленьня Нікаляса Мадура на пасаду кіраўніка дзяржавы на другі тэрмін. Тады ж кіраўнік парлямэнта Вэнэсуэлы Хуан Гуайдо абвясьціў сябе часова выконваючым абавязкі прэзыдэнта і запатрабаваў правядзеньня незалежных выбараў. Гуайдо падтрымалі ЗША, многія краіны Лацінскай Амэрыкі і большасьць краін Эўразьвяза. Дзеючага прэзыдэнта Нікаляса Мадуру лічаць легітымным Расея, Кітай, Куба і Мэксіка.
