Міністарка фінансаў Украіны Аксана Маркарава дала вялікае інтэрвію ўкраінскай службе Радыё Свабода, у якім сярод іншага ацаніла вынікі эканамічных рэформаў, праведзеных у краіне ва ўмовах вайны. Прапануем фрагмэнт, а таксама поўную відэавэрсію інтэрвію.
— Паводле заявы Пятра Парашэнкі, Украіна страціла 16% ВУП праз расейскую агрэсію ў 2014-2015 гадах. Пры гэтым прэзыдэнт Украіны адзначаў, што пры ўсіх цяжкасьцях, пры тым, што вайна не спыняецца ні на адзін дзень, Украіна адштурхнулася ад дна. У той жа час Сусьветны банк канстатуе, што Ўкраіне трэба да 100 гадоў, каб дагнаць Эўропу па даходах. Ці справядлівыя сьцьвярджэньні некаторых кандыдатаў у прэзыдэнты, што Украіна нібыта зьяўляецца самай беднай дзяржавай Эўропы?
— Я памятаю вельмі добра сьнежань 2014 году, калі з камандай Натальлі Ярэсько мы прыйшлі ў міністэрства. Цяпер аб гэтым ужо мала хто ўспамінае. Але і дэвальвацыя, і інфляцыя, і сапраўды эканамічнае падзеньне, таму задачай № 1 было спыніць гэта. Гэта было зроблена. І цяпер ужо 12 кварталаў запар эканоміка Украіны расьце.
Калі паглядзець на вынік, якога мы дасягнулі за папярэднія 4 гады, вядома, ён незвычайны, калі можна так сказаць. І мала хто верыў на самай справе, што нам удасца так хутка стабілізаваць эканоміку і вярнуцца ўжо, можна сказаць, да стабільнага росту. Інфляцыя — менш за 10%. Золатавалютныя рэзэрвы на сёньня самыя высокія за апошнія 5 гадоў. Калі казаць пра сытуацыю макраэканамічную, то яна досыць стабільная на сёньняшні дзень.
Мы як раз нядаўна прадстаўлялі справаздачу эканамічнага разьвіцьця. І калі Украіна захавае статус-кво такой, як цяпер, то для таго, каб дагнаць Польшчу, такая, як яна ёсьць сёньня, трэба 50 гадоў. Гэта, вядома, для нас доўгі тэрмін. І мы сапраўды плянуем і маем рэцэпты, як зрабіць, каб дагнаць хутчэй. Для гэтага нам трэба паскорыць эканамічны рост.
Як жа паскорыць эканамічны рост? Першае — гэта інвэстыцыі. Безумоўна! Гэта значыць, калі цяпер мы прыцягваем у розныя гады 1,5 мільярда, 2 мільярды, 3 мільярды, 2,4 мільярда ў мінулым годзе, то гэтага наогул не дастаткова для краіны і для такой эканомікі, як наша. Гэта, можна сказаць, абсалютна непрыкметныя. Гэтыя інвэстыцыі павінны быць плюс 10000000000. Для гэтага нам трэба эфэктыўна праводзіць прыватызацыю.
І гэта бізнэс-клімат. Безумоўна, дэрэгуляваньне, якой займаецца Кабінэт міністраў апошнія тры гады, ужо дае свой плён. Мы прасунуліся вельмі моцна ў індэксе вядзеньня бізнэсу. Гэта значыць, мы падняліся з 140-х месцаў да 71-га.
— І ў чым гэта праяўляецца для шараговага бізнэсоўца?
— Дзякуючы чаму мы дадалі ў гэтым індэксе? Тэрміны па адкрыцьці і закрыцьці кампаній, доступ да электронных паслугаў, даведак, якія можна атрымаць ужо он-лайн, а не ісьці і стаяць у чэргах. Гэта ня толькі зручнасьць, гэта яшчэ і на самай справе барацьба з карупцыяй.
— Меншая бюракратызацыя, так?
Так. Будаўнічыя нормы, некаторыя ўпершыню з савецкіх часоў былі перагледжаны і сур’ёзна дерэгуляваныя. Гэта тыя рэчы, якія адкрываюць новыя магчымасьці для прыватнага бізнэсу — малога, мікра, сярэдняга. І гэта дае вынік.
