Прэс-сакратар Крамля Дзьмітры Пяскоў паведаміў, што Ўладзімір Пуцін і Аляксандар Лукашэнка, якія сустрэліся ў Сочы 13 лютага, будуць кантактаваць адзін з адным і ў два наступныя дні.
«Ужо заплянавана, што так ці інакш кантакты будуць працягвацца паміж Пуціным і Лукашэнкам заўтра [14 лютага — РС] і нават пасьлязаўтра [15 лютага — РС]», — цытуе Пяскова агенцтва ТАСС.
Пяскоў дадаў, што на 15 лютага заплянаваная сустрэча прэзыдэнтаў Расеі і Беларусі з удзелам міністраў дзьвюх краін, якія курыруюць адукацыю, культуру і спорт.
Пяскоў таксама ня выключыў, што вечарам 14 лютага Лукашэнка можа далучыцца да сустрэчы прэзыдэнтаў Расеі, Турэччыны і Ірану, якая будзе прысьвечаная сытуацыі ў Сырыі.
«Пасьля завяршэньня афіцыйнай часткі трохбаковага саміту мы не выключаем, што можа і Аляксандар Лукашэнка таксама далучыцца да прэзыдэнтаў Расеі, Ірану і Турэччыны», — сказаў Пяскоў журналістам. Ён дадаў, што магчымая размова Лукашэнкі з трыма прэзыдэнтамі ня будзе датычыць сырыйскіх пытаньняў.
Аляксандар Лукашэнка знаходзіцца з рабочым візытам у Сочы, дзе 13 лютага ён правёў сустрэчу з Уладзімірам Пуціным, а потым пакатаўся з расейскім прэзыдэнтам і сынам Мікалаем на лыжах.
