Аб’яднаная грамадзянская партыя вылучыла выконваючага абавязкі старшыні арганізацыі Мікалая Казлова прэтэндэнтам на ўдзел у праймэрыз па вызначэньні адзінага кандыдата ў прэзыдэнты ад правацэнтрысцкай кааліцыі, паведамляе БелаПАН.
Такое рашэньне прынятае 13 студзеня на пашыраным пасяджэньні палітрады АГП у Менску.
У правацэнтрысцкага кааліцыю акрамя АГП уваходзяць рух «За Свабоду» і аргкамітэт па стварэньні партыі «Беларуская хрысьціянская дэмакратыя». Раней называлася, што ад іх у праймэрыз прымуць удзел старшыня «За Свабоду» Юрась Губарэвіч і сустаршыня БХД Павал Севярынец.
Мікалай Казлоў нарадзіўся ў Валожыне ў 1967 годзе. Пасьля школы паступіў у Навасібірскую вышэйшую вайсковую вучэльню. Служыў у войску, апошняе месца службы — Сярэдняя Азія, Узбэкістан. Удзельнічаў у падзеях у Нагорным Карабаху.
Пасьля развалу СССР напісаў рапарт аб звальненьні. Вярнуўся на радзіму і паступіў на службу ў крымінальны вышук, дзе і працаваў 18 гадоў. Скончыў службу падпалкоўнікам, опэрупаўнаважаны ў асабліва важных справах.
З працы Казлоў сышоў у выніку скандальнай гісторыі на парлямэнцкіх выбарах 2008 году, калі нёс службу на выбарчым участку. Участковая камісія фальсыфікавала выбары, укідвала бюлетэні ў скрынку, пра што Казлоў паведаміў кіраўнікам, напісаў адпаведныя рапарты.
Чарговыя прэзыдэнцкія выбары павінны прайсьці не пазьней за 30 жніўня 2020 года.
