Амбасада Расеі накіравала ў Міністэрства замежных спраў Беларусі ноту з просьбай улічыць «усе гуманітарныя абставіны» ў справе аб высылцы прэс-сакратаркі Аб’яднанай грамадзянскай партыі Ганны Красулінай, піша БелаПАН.
Прэс-сакратар расейскай амбасады ў Беларусі Аляксей Маскалёў паведаміў, што зварот Красулінай атрымалі, гэтае пытаньне знаходзіцца на кантролі расейскай консульскай службы. Супрацоўнікі амбасады сустракаліся з Красулінай 26 лістапада.
«Мы накіравалі зварот у МЗС з просьбай улічыць усе гуманітарныя абставіны яе справы пры разглядзе заявы аб адмене рашэньня аб высылцы», — сказаў Маскалёў.
Маскалёў падкрэсьліў, што расейскі бок разглядае Красуліну ня як палітычную дзяячку, а як расейскую грамадзянку, якой амбасада павінна пры неабходнасьці аказваць прававую дапамогу.
Паводле Красулінай, на сустрэчы ёй распавялі, што летась зь Беларусі выслалі 560 грамадзян Расейскай Фэдэрацыі, зь іх 130 — за кіраваньне аўто ў нецьвярозым стане.
28 лістапада Красуліна мае намер абскардзіць рашэньне аб сваёй высылцы ў ГУУС Менгарвыканкаму, а пры неспрыяльным выніку будзе зьвяртацца ў суд. На час разгляду апэляцыі ёй павінны падоўжыць час знаходжаньня ў Беларусі.
Што важна ведаць пра дэпартацыю Ганны Красулінай?
Міграцыйная служба Міністэрства ўнутраных спраў паведаміла 13 лістапада прэс-сакратарцы АГП Ганьне Красулінай пра рашэньне аб яе высылцы «ў інтарэсах грамадзкага парадку».
Прычынай для высылкі Красулінай сталі адміністрацыйныя правапарушэньні:
- пікет падчас выбарчай кампаніі;
- сустрэча з ізалятара затрыманых;
- сплачаны на месцы штраф за неаплачаны праезд.
У АГП лічаць, што матывы дэпартацыі — палітычныя.
Тэрмін высылкі: 1 год.
Хто такая Красуліна?
Ганна Красуліна нарадзілася ў Расеі і мае расейскае грамадзянства. У Беларусь яна пераехала ў 2002 годзе. Муж і дзеці Красулінай маюць беларускае грамадзянства. Сваіх бацькоў Красуліна перавезла ў Беларусь.
Красуліна мае пасьведчаньне на жыхарства ў Беларусі да 30 студзеня 2019 году.
Каго яшчэ высылалі і дэпартавалі зь Беларусі?
У 2011 годзе беларускія ўлады дэпартавалі з краіны журналіста газэты «Маскоўскі камсамолец» Ігара Кармазіна, заявіўшы, што ён нясе пагрозу бясьпецы краіны.
У 2014 годзе ўлады пазбавілі віду на жыхарства і дэпартавалі на 3 гады праваабаронцу Алену Танкачову. Сёлета Танкачова атрымала дазвол на часовае пражываньне ў Беларусі.
Карэспандэнта тэлеканалу НТВ Аляксандра Ступнікава ў 1997 годзе пазбавілі акрэдытацыі і выслалі зь Беларусі. У 2003 годзе прадстаўніцтва НТВ у Беларусі зачынілі, а яго кіраўніка Паўла Селіна дэпартавалі з краіны бяз права ўезду тэрмінам на 5 гадоў. У 2009-м зь Беларусі дэпартавалі журналістаў расейскай тэлекампаніі НТВ Аляксея Малкава і Юрыя Бабенку, якія здымалі сюжэт пра зьніклых апазыцыянэраў.
У 2006-м дэпартавалі расейскага палітоляга Андрэя Суздальцава.
13 сьнежня 2005 году карэспандэнтцы Польскага тэлебачаньня Агнешцы Рамашэўскай было адмоўлена ва ўезьдзе ў Беларусь, нягледзячы на дзейную візу і гадавую акрэдытацыю Міністэрства замежных спраў Беларусі.
У чэрвені 2004-га за парушэньне «правілаў знаходжаньня замежных грамадзянаў» дэпартавалі ва Ўкраіну на 5 гадоў намесьніка рэдактара газэты «Время» Міхаіла Падаляка.
