Ва Ўкраіне ў чацьвёртую суботу лістапада адзначаецца Дзень памяці ахвяраў Галадамору — штучнага голаду, створанага савецкімі ўладамі на тэрыторыі тагачаснай УССР ў 1932-33 гадах. Колькасьць яго ахвяр ацэньваецца на некалькі мільёнаў.
У апублікаванай заяве Дзярждэпартамэнта ЗША з нагоды 85-гадовай гадавіны Галадамору гаворыцца, што ён быў адным з самых жудасных злачынстваў XX стагодзьдзя і зьяўляецца напамінам пра жорсткасьць камуністычнага рэжыму. Адказнасьць за яго ўскладаецца на кіраўніцтва тагачаснага СССР на чале з Іосіфам Сталінам, якое імкнулася, як сказана ў дакумэнце, «заняволіць ўкраінскі народ і нацыю».
«У нашы дні ўкраінцы зноў гінуць у выніку спробаў Расеі разбурыць іх ідэнтычнасьць і заходнія памкненьні», — гаворыцца ў заяве амэрыканскага зьнешнепалітычнага ведамства. У ёй на Маскву ўскладаецца адказнасьць за канфлікт у Данбасе і падкрэсьліваецца, што ЗША падтрымліваюць сувэрэнітэт і тэрытарыяльную цэласнасьць Украіны.
Сёлета Сэнат ЗША прыняў рэзалюцыю, у якой Галадамор названы генацыдам украінскага народу. Гэтак жа яго афіцыйна характарызуе 21 штата ЗША.
Расея на афіцыйным узроўні адмаўляецца прызнаць Галадамор генацыдам.
