Паліцыя Вялікай Брытаніі 22 лістапада апублікавала новыя відэа з падазраванымі ў атручваньні былога расейскага шпіёна Сяргея Скрыпаля і ягонай дачкі Юліі ў брытанскім Солсбэры у сакавіку.
Паліцыя апублікавала кадры з падазраванымі, якія перасоўваюцца ў Солсбэры 4 сакавіка — у дзень, калі Скрыпалёў знайшлі непрытомнымі.
4 сакавіка ў Солсбэры нэрвова-паралітычным рэчывам «Навічок» былі атручаныя былы палкоўнік ГРУ Расеі Сяргей Скрыпаль і яго дачка Юлія. Лёндан лічыць, што рэчыва трапіла ў Брытанію з тэрыторыі Расеі і ўскладае віну за атручваньне на расейскія ўлады. Расія абвінавачваньні абвяргае.
Замах на былога расейскага выведніка Сяргея Скрыпаля і ягоную дачку ў брытанскім Солсбэры ў сакавіку сёлета прывёў да сур’ёзнага крызісу ў стасунках паміж краінамі Захаду і Расеяй. Каля 30 краін абвясьцілі аб высылцы расейскіх дыпляматаў у знак салідарнасьці зь Вялікай Брытаніяй. Расея ў адказ пачала высылаць супрацоўнікаў заходніх дыпляматычных місій.
Брытанскае сьледзтва ідэнтыфікавала тых, хто напаў на Сяргея Скрыпаля, як «Аляксандра Пятрова» і «Руслана Башырава». У Лёндане адзначылі, што сапраўдныя імёны падазраваных могуць адрозьнівацца ад прыведзеных у іхных пашпартах.
Група расьсьледаваньня Bellingcat высьветліла, што сапраўднае імя «Аляксандра Пятрова» — Аляксандар Мішкін. Паводле Bellingcat, ён атрымаў мэдыцынскую адукацыю ў адной з вайсковых акадэмій і зьяўляецца супрацоўнікам расейскай вайсковай выведкі, а «Руслан Башыраў» — расейскі выведнік Анатоль Чапіга.
