У менскім культурным цэнтры «Корпус» адкрыўся фэстываль ХJAZZ, прыдуманы вядомым нямецкім кампазытарам, трубачом і піяністам Сэбастыянам Студніцкім.
Сем музыкаў з Бэрліну паабяцалі за тры дні ператварыць Менск у джазавую лябараторыю.
Раней такія джазавыя фэстывалі Сэбастыян Студніцкі праводзіў у Турэччыне, Расеі, Польшчы, Ізраілі і Францыі.
«Да Менску ляцець усяго адну гадзіну з Бэрліну, і ўсё даволі далёка ад нас. Таму для мяне гэта экзатычная краіна. Я зь нецярпеньнем чакаю, як гэта ўсё пройдзе тут, і рады магчымасьці арганізаваць гэтае сьвята тут», — сказаў карэспандэнту Свабоды Сэбастыян Студніцкі.
Ён мяркуе даведацца падчас фэстывалю, наколькі Менск джазавы горад. Раней ён выступаў толькі ў Горадні.
«Таму ў бліжэйшыя дні, я спадзяюся, мы адкрыем для сябе Менск менавіта з джазавага пункту гледжаньня. У Горадні я ўдзельнічаў у адным з фэстываляў. Публіка там адкрытая, і было прыемна граць для гэтых людзей. Я чакаю, што людзі і ў Менску будуць настолькі ж адкрытыя», — сказаў Сэбастыян Студніцкі.
16 лістапада ў культурным хабе «ОК16» пройдзе вялікі джазавы канцэрт з удзелам квартэта Сэбастыяна Студніцкага і менскіх «Мрояў Пафнуція», трыё Канстанціна Гарачага і квартэта Міхаіла Філіпені.
17 лістапада Сэбастыян Студніцкі і Пафнуцій запрашаюць на музычную праграму «Джаз для дзяцей» у галерэі «Арт-Беларусь».
У гэты ж дзень у вялікай залі філярмоніі — канцэрт «Memento», на якім джазавае трыё Студніцкага выступіць разам зь Дзяржаўным акадэмічным сымфанічным аркестрам Беларусі.
У Менску канцэрты праходзяць пры падтрымцы пасольства Нямеччыны і завяршаюць сёлетнія Тыдні Нямеччыны ў Беларусі.
