Археолягі выявілі ў Эгіпце дзясяткі муміфікаваных катоў, а таксама рэдкія муміі жукоў скарабэяў.
Як паведамляе The Guardian, знаходка, узрост якой можа дасягаць шасьці тысяч гадоў, разьмяшчаецца ў нэкропалі Сакара пад Каірам.
«Забальзамаваныя жукі — гэта нешта сапраўды ўнікальнае», — заявіў генэральны сакратар Вышэйшай рады па справах старажытнасьцяў Эгіпту Мустафа Вазіры.
Разам з муміямі катоў і скарабэяў ў грабніцы знайшлі пазалочаныя статуі катоў і бронзавую статую старажытнаэгіпецкай багіні катоў Бастэт. Група археолягаў таксама знайшла ў пахаваньні драўляныя выявы кобры і кракадзіла, а таксама амулеты, прылады для пісаньня і кошыкі для папірусу.
