У аўторак прэс-служба Парлямэнцкай асамблеі Рады Эўропы (ПАРЭ) паведаміла, што асамблея вярнула на дапрацоўку ў профільны камітэт праект рэзалюцыі аб зьмене рэглямэнту. За гэтае рашэньне прагаласавалі 99 дэпутатаў, супраць былі 79, яшчэ 16 устрымаліся. Прыняцьце рэзалюцыі дазволіла б Расеі вярнуцца да ўдзелу ў сэсіях арганізацыі.
У праекце рэзалюцыі пад назвай «Удасканаленьне працэсу прыняцьця рашэньняў Парлямэнцкай асамблеі што да паўнамоцтваў і галасаваньня» Расея ня згадваецца, але ў выпадку яго зацьвярджэньня дэлегацыя Расеі магла б вярнуцца ў ПАРЭ ўжо на наступнай сэсіі ў студзені.
Адзін зь сяброў камітэту, які падрыхтаваў кампрамісныя прапановы ў канфлікце ПАРЭ з Расіяй, нямецкі сацыял-дэмакрат Франк Швабэ паведаміў, што гаворка ідзе пра «збалянсаваныя прапановах». Такі кампраміс не азначае «індульгенцыю для Масквы» і не прывядзе да поўнага аднаўленьня правоў дэлегацыі Расеі ў ПАРЭ, падкрэсьліў Швабэ.
Пасьля расійскай анэксіі ўкраінскага паўвострава Крым у красавіку 2014 году ПАРЭ пазбавіла расейскую дэлегацыю права голасу. Масква пазбавілася таксама магчымасьці працаваць у кіраўнічых структурах асамблеі і ўдзельнічаць у назіраньні за выбарамі. У чэрвені 2017 году Расія абвясьціла, што прыпыняе выплату ўзносаў у бюджэт Рады Эўропы да поўнага і безумоўнага аднаўленьня паўнамоцтваў яе дэлегацыі ў ПАРЭ. Штогадовы ўзнос Масквы складаў каля 33 мільёнаў эўраў — амаль 10 працэнтаў бюджэту арганізацыі. Цяпер Расея не прысутнічае ў ПАРЭ, але працягвае працу ў Камітэце міністраў Рады Эўропы, адзначае «Нямецкая хваля».
