Амаль тры гадзіны дапытвалі 8 жніўня заснавальніка парталу Tut.by Юрыя Зісера па «справе БелТА». Ён даў падпіску аб неразгалошваньні.
«Усё нармальна, пачуваюся добра», — пракамэнтаваў акалічнасьці допыту Зісер.
Думка заснавальніка Tut.by наконт «справы БелТА» не зьмянілася. 7 жніўня Юры Зісер напісаў у сваім фэйсбуку пра відавочную палітычную падаплёку затрыманьняў журналістаў і ператрусу ў офісе Tut.by.
«Я па-ранейшаму лічу, што маштаб падачы гэтай падзеі перад грамадзкасьцю дзяржава раздула да касьмічных маштабаў, гэта не адпавядае маштабам учыненага», — сказаў Зісер.
Юры Зісер ня ведае, колькі можа заняць расьсьледаваньне і суд, але адзначыў што справа можа зацягнуцца.
«Гэта не да мяне пытаньне, але я думаю, калі гэта ўжо такое расьсьледаваньне, то гэта месяцы, а можа і гады» – сказаў Зісер.
З затрыманымі журналісткамі парталу Зісер у Сьледчым камітэце не сустракаўся, новай інфармацыі пра іх няма.
7 жніўня затрымалі 8 супрацоўнікаў Tut.by. Чатырох — Ульляну Бабаед, Людмілу Чэкіну, Яўгенію Беразюк, Дзьмітрыя Бобрыка — пасьля допыту ўвечары ў аўторак адпусьцілі. Яшчэ 4 журналісты застаюцца затрыманымі: Марына Золатава, Ганна Калтыгіна, Ганна Ермачонак і Галіна Ўласік.
Да затрыманых журналістаў не пускаюць адвакатаў, допыты не праводзяць
Затрыманьні незалежных журналістаў. Што важна ведаць
- Сьледчы камітэт завёў крымінальную справу за несанкцыянаваны доступ да кампутарнай інфармацыі. Максымальнае пакараньне паводле ч. 2 арт. 349 — абмежаваньне ці пазбаўленьне волі на тэрмін да 2 гадоў.
- 7–8 жніўня прайшлі ператрусы ў офісах Tut.by, БелаПАН, Realt.by, газэты «Культура» і ТАА «Айціві». Таксама па справе праходзіць выдавецкі дом «Беларуская навука».
- Вядома, што цягам 7–9 жніўня затрымалі 17 журналістаў. Іх вызвалялі пасьля допыту ў СК.
- 9 жніўня СК заявіў, што галоўная рэдактарка Tut.by Марына Золатава прызнала віну.
- Падставай для завядзеньня крымінальнай справы паслужыла паведамленьне БелТА пра збоі ў кліентаў пры доступе да платнай падпіскі на паслугі.
- Платная падпіска БелТА каштуе 612 рублёў на месяц.
- Хто асудзіў затрыманьні журналістаў і ператрусы ў рэдакцыях. Сьпіс
- У чэрвені 2018 году супраць кіраўніка БелаПАН Алеся Ліпая завялі крымінальную справу за ўхіленьне ад сплаты падаходнага падатку.
