Былая беларуская, а цяпер расейская фігурыстка Тацяна Наўка, жонка прэс-сакратара Ўладзімера Пуціна Дзьмітрыя Пяскова 16 ліпеня апублікавала ў Instagram фота з Аляксандрам Лукашэнкам.
У подпісе пад здымкам Тацяна Наўка нагадала, што «па-расейску з 1991 году пішацца Беларусь», дадаўшы хэштэг #урокбелорусскогоязыка.
Як сьцьвярджае Наўка, яны з Аляксандрам Лукашэнкам «старыя сябры» — спартоўка нагадала, што на дзьвюх Алімпіядах выступала за Беларусь (з 1998 году выступае за Расею, у 2006 годзе ўзяла алімпійскае золата ў парным фігурным катаньні). Паводле яе, калі яна сустрэлася з Лукашэнкам пасьля фіналу чэмпіянату сьвету ў футболе, той «абняў яе як родную».
Глядзіце таксама:
«Нельга было прызначаць пэнальці». Як Лукашэнка абдымаўся з прэзыдэнткай Харватыі
«Хадзі сюды, дзетка». Як Лукашэнка размаўляе зь «міс Беларусь», якой прапанаваў пакіраваць калгасам
Ці падзяляе муж Наўкі ейны погляд на напісаньне назвы беларускай дзяржавы, невядома. Ягоны начальнік Уладзімір Пуцін даволі часта кажа «Белоруссия». На сайце Крамля знаходзяцца абодва варыянты: і Беларусь, і «Белоруссия», у тым ліку ў форме «Республика Белоруссия».
Міністар замежных справаў Расеі Сяргей Лаўроў тры месяцы таму расказваў, што называе беларускую дзяржаву «як зручна ў дадзены момант» — і так, і гэтак. У 2009 годзе тагачасны прэзыдэнт Расеі Дзьмітры Мядзьведзеў рэкамэндаваў ужываць толькі назву Беларусь, а не «Белоруссия».
