27 чэрвеня ў Менску супрацоўнікі галоўнага ўпраўленьня па барацьбе з арганізаванай злачыннасьцю і карупцыяй МУС пры дапамозе зводнага атраду хуткага рэагаваньня затрымалі грамадзяніна Банглядэшу, які датычны да арганізацыі каналу незаконнай міграцыі суайчыньнікаў у Эўразьвяз транзытам празь Беларусь.
Падчас асабістага надгляду ў грамадзяніна Банглядэшу знойдзена 3 тысячы даляраў і 3,8 тысячы эўра. Гэтыя грошы былі атрыманыя напярэдадні ў якасьці платы за «паслугі», паведамляе афіцыйны сайт МУС.
Паводле начальніка аддзелу ГУБАЗіК Аляксандра Азарава, перапраўляць нелегалаў па-за пунктамі пропуску на беларускай мяжы замежніку дапамагалі землякі. Двое зь іх таксама затрыманыя. Адзін хаўрусьнік дзейнічаў у Маскве: набываў квіткі на футбольныя матчы чэмпіянату сьвету па футболе ў Расеі, па якіх мігранты афармлялі ID-карты заўзятараў і на законных падставах прыбывалі на расейскую тэрыторыю.
Але футбол мігрантаў не цікавіў, «фанаты» перапраўляліся ў Беларусь. Яшчэ адзін фігурант адказваў непасрэдна за адпраўку нелегалаў зь Беларусі ў Эўразьвяз. Яго затрымалі ў Пастаўскім раёне Віцебскай вобласьці: разам з чатырма мігрантамі ён спрабаваў перасекчы мяжу зь Літвой.
Беларускія апэратыўнікі маюць зьвесткі, што цяпер у Маскве могуць знаходзіцца каля 100 грамадзян Банглядэшу, якія пры дапамозе затрыманых у Беларусі прыбылі пад выглядам футбольных заўзятараў і маюць намер незаконна трапіць у Эўразьвяз.
