У лідэраў ЭЗ вельмі мала часу, каб супакоіць сваіх грамадзян наконт таго, што Эўрапейскі Зьвяз можа кантраляваць міграцыю, перш чым аўтарытарныя палітыкі скарыстаюцца гэтым. Пра гэта заявіў у чацьвер прэзыдэнт Эўразьвязу Дональд Туск.
У лісьце да лідэраў ЭЗ, якія зьбяруцца на саміт у чацьвер, Туск прапанаваў новыя крокі па ўмацаваньні вонкавых межаў, у тым ліку стварэньне цэнтраў прыёму мігрантаў у Паўночнай Афрыцы.
«Усё больш людзей пачынаюць верыць, што толькі моцныя аўтарытэты, антыэўрапейскія і антылібэральныя па духу, схільныя да відавочнага аўтарытарызму, здольныя спыніць хвалю нелегальнай міграцыі» — сказаў Туск. «Калі людзі вераць, што толькі такія могуць прапанаваць эфэктыўнае рашэньне міграцыйнага крызісу, яны таксама будуць верыць у нешта яшчэ, што тыя кажуць» — дадаў прэзыдэнт ЭЗ.
«Стаўкі вельмі высокія, а часу мала» — папярэдзіў Туск. Ён сказаў, што ЭЗ калектыўна скараціў незаконныя памежныя пераходы на 96% у параўнаньні з 2015 годам, калі Эўропа сутыкнулася з самым цяжкім міграцыйным крызісам з часоў Другой сусьветнай вайны.
У мэтах умацаваньня вонкавай мяжы Туск прапанаваў саміту ўхваліць «пагрузачныя плятформы па-за межамі Эўропы», каб аддзяліць сапраўдных уцекачоў ад эканамічных мігрантаў, якія могуць быць адпраўленыя назад у іх родныя краіны.
