Краіны Вішаградзкай чацьвёркі (Вугоршчына, Польшча, Славаччына і Чэхія), а таксама Аўстрыя правялі ў Будапэшце сустрэчу ў пытаньнях міграцыі. Лідэры краін таксама абмеркавалі абарону вонкавых межаў Эўразьвязу. Пра гэта паведамляе Reuters.
Прэм’ер-міністар Чэхіі Андрэй Бабіш, выступаючы на прэс-канферэнцыі па выніках сустрэчы, заявіў аб неабходнасьці ўзмацненьня Эўрапейскага агенцтва памежнай і берагавой аховы Frontex. На думку Бабіша, штат супрацоўнікаў агенцтва мусіць быць павялічаны да дзесяці тысяч чалавек. Раней ідэю ўзмацненьня Frontex падтрымалі Бэрлін і Парыж.
Кіраўнік ураду Вугоршчыны Віктар Орбан заявіў, што краіны Вішаградакай чацьвёркі ня будуць браць удзелу ў міні-саміце краін ЭЗ у пытаньнях міграцыі, які пройдзе ў 28-29 ліпеня ў Брусэлі. Нефармальную сустрэчу арганізоўвае Эўрапейская камісія. На думку Орбана, мерапрыемства для абмеркаваньня праблем мігрантаў мусіць арганізоўваць Эўрапейская рада.
Паводле інфармацыі нямецкага агенцтва DPA, на сустрэчу прыедуць прадстаўнікі Аўстрыі, Італіі, Францыі, Грэцыі, Балгарыі і Гішпаніі.
Напярэдадні парлямэнт Вугоршчыны прагаласаваў за пакет законаў, якія прадугледжваюць пакараньне за дапамогу ўцекачам і нелегальным мігрантам.
Канцлер Нямеччыны Ангела Мэркель выступае за раўнамернае разьмеркаваньне ўцекачоў ўнутры Эўразьвязу. Падтрымаць Мэркель у гэтым пытаньні абяцаў прэзыдэнт Францыі Эманюэль Макрон. Краіны Вішаградзкай чацьвёркі выступаюць з рэзкай крытыкай такога падыходу.
