Упраўленьне вярхоўнага камісара ААН у справах бежанцаў заяўляе, што па выніках 2017 году ў сьвеце налічваецца каля 69 мільёнаў чалавек, якія ўцяклі ад вайны, гвалту або перасьледу, што ёсьць новым рэкордам.
Паводле штогадовай справаздачы, апублікаванай 19 чэрвеня, колькасьць уцекачоў і ўнутрана перамешчаных асоб узрасла на 4,6% у 2017 годзе ў параўнаньні з мінулым годам.
Амаль 70% бежанцаў уцяклі зь пяці краін — Сырыі, Аўганістану, Паўднёвага Судану, Бірмы і Самалі.
Вярхоўны камісар ААН у справах бежанцаў Філіпа Гранды сказаў, што патокі ўцекачоў могуць істотна замарудзіцца, калі ўдасца завяршыць войны і вырашыць крызісы ў гэтых краінах. «Але мы ня бачым значнага прагрэсу ў справе дасягненьня міру хоць у якой-небудзь з гэтых краін», — зазначыў Гранды.
Турэччына, Пакістан, Лібан і Іран таксама сярод краін з найбольшай колькасьцю ўцекачоў.
