Кіраўнікі МЗС Нямеччыны, Расеі, Украіны і Францыі — так званай «нармандзкай чацьвёркі» — пачалі сустрэчу ў Бэрліне, на якой абмяркоўваюць ваенны канфлікт на ўсходзе Ўкраіны. У прыватнасьці, чакаецца, што будзе абмяркоўвацца пытаньне аб размяшчэньні міратворчай місіі ААН на Данбасе.
Перад пачаткам перамоў міністар замежных спраў Нямеччыны Гайка Маас заявіў журналістам, што такая місія была б «правільнай мерай», якая б садзейнічала выкананьню мірнага пагадненьня, дасягнутага ў 2015 годзе ў Менску.
Усе бакі перамоваў падтрымліваюць такую місію, але маюць розныя пазыцыі адносна яе мандату.
Украіна, Нямеччына і Францыя хочуць, каб войскі ААН былі разгорнутыя на ўсіх тэрыторыях, якія кантралююць баевікі пры падтрымцы з боку Расеі, у тым ліку на расейска-ўкраінскай мяжы. Масква выступае супраць гэтай ідэі.
Ранейшыя спробы ўсталяваць дзейсны рэжым спыненьня агню ў зоне канфлікту былі беспасьпяховымі. Ад красавіка 2014 году на Данбасе загінулі больш за 10 300 чалавек.
Больш за паўмільёна мірных жыхароў жывуць у межах пяці кілямэтраў ад лініі кантакту працягласьцю 457 кілямэтраў. Гэтыя людзі пастаянна рызыкуюць трапіць пад абстрэлы.
6 чэрвеня Рада Бясьпекі ААН заклікала ўсе бакі канфлікту выканаць дамоўленасьці 2015 году і выказала «сур’ёзную занепакоенасьць» у сувязі з пагаршэньнем сытуацыі на ўсходзе Ўкраіны. Усе 15 чальцоў Рады Бясьпекі, уключаючы Расею, пагадзіліся на заяву, ухваленую па ініцыятыве Францыі і Нямеччыны. Гэта першая заява Рады Бясьпекі па Ўкраіне са студзеня 2017 году.
