Арбітраж Беларускай фэдэрацыі футболу (БФФ) 19 сакавіка адхіліў заяву футбольнага клюбу «Крумкачы» наконт рашэньня Камітэту клюбнага ліцэнзаваньня, піша «Прессбол».
На паседжаньні Камітэту клюбнага ліцэнзаваньня БФФ 26 лютага «Крумкачам» адмовілі ў ліцэнзіі праз «сыстэматычныя парушэньні» патрабаваньняў рэглямэнту Фэдэрацыі футболу — неаднаразовае парушэньне тэрмінаў падачы дакумэнтаў і «зрыў працэсу ліцэнзаваньня». Апэляцыю клюбу адхілілі 6 сакавіка, пасьля чаго каманда падала заяву на арбітражнае разьбіральніцтва, рашэньні якога зьяўляецца канчатковым.
«Крумкачы» сьцьвярджаюць, што ліцэнзіі іх пазбаўляюць з парушэньнем правілаў Фэдэрацыі.
У звароце да заўзятараў «Крумкачы» адзначылі, што клюб адхілены ад працэдуры ліцэнзаваньня «не праз фінансавыя прычыны і нават не праз адсутнасьць дакумэнтаў» — «клюб прысудзілі да найвышэйшай меры пакараньня за парушэньне тэрмінаў іх падачы».
«На сёньняшні дзень у клюбу гатовыя ўсе дакумэнты... „Крумкачы“ цалкам гатовыя да найвышэйшай лігі сэзону-2018. Як кадрава, так і фінансава. Мы здольныя гэта прадэманстраваць у максымальна кароткія тэрміны, але нам не даюць такой магчымасьці. На наш погляд, за гэтым рашэньнем стаяць якія заўгодна матывы, але толькі не прававыя і ніяк не спартовыя», — гаварылася ў звароце.
Клюб, заснаваны аматарамі
Аматары футболу заснавалі ФК «Крумкачы» ў 2014 годзе. Дзякуючы велізарнаму энтузіязму і валянтэрскай працы, ужо ў сэзоне-2016 клюб праводзіў першы сэзон у Найвышэйшай лізе, дзе захаваў «прапіску» і ў наступным сэзоне.
Праўда, фінансавыя праблемы «Крумкачоў» паўсталі яшчэ да таго, як клюб пачаў гуляць у Найвышэйшай лізе. У 2016-м яны сталі першымі ў элітным дывізіёне, хто ня меў дзяржаўнай падтрымкі. Традыцыйна каманды замацаваныя альбо за раённымі і гарадзкімі выканкамамі, альбо за буйнымі прадпрыемствамі.
Сэзон-2017 каманда зноў пачала з абмеркаваньня фінансавага становішча. Яшчэ напачатку 2016 году барысаўскі БАТЭ пазычыў «Крумкачам» 150 тысяч даляраў. Палову грошай каманда мусіла вярнуць у жніўні 2016-га, палову — у сьнежні. Аднак празь цяжкае фінансавае становішча «Крумкачы» разьлічыцца ня здолелі. У пачатку 2017-га эканамічны суд Менску вынес рашэньне спагнаць грошы з «Крумкачоў» у загадным парадку.
Праз перабоі з выплатай заробкаў склад «Крумкачоў» пакінуў тузін гульцоў і галоўны трэнэр. Дайшло нават да байкатаваньня матчаў з боку футбалістаў — затрымкі дасягнулі некалькі месяцаў.
Трэнэр — у БАТЭ, нападнік — у «Дынама-Менск». Куды разьляцеліся «Крумкачы»
Увосень 2017 клюб сабраў праз краўдфандынг звыш 29 тысяч рублёў — чвэрць ад патрэбнай сумы.
На фінішы леташняга чэмпіянату Беларусі «Крумкачы» да апошняга змагаліся за выжываньне і аказаліся 13-мі сярод 16 клюбаў.
На самым пачатку 2018 году паведамлялася, што клюб не выратуе ўжо нішто, аднак жа ў момант, калі большасьць ключавых гульцоў «разьляцелася», нечакана прыйшоў інвэстар, які пагадзіўся ўкласьці на сэзон $600 тысяч, а таксама вырашыць праблему з даўгамі.
Аднак жа, нягледзячы на тое, што справы каманды пайшлі ўгару, Беларуская фэдэрацыя футбола адмовіла «птушкам» у ліцэнзаваньні на новы сэзон.
