У Магілёве прадставілі грамадзкасьці старадрук XVII стагодзьдзя, набыты за сродкі гарадзкога бюджэту. Рэдкі экзэмпляр кнігі «Апостал», выдадзенай друкаром Сьпірыдонам Собалем у 1632 годзе, папоўніць экспазыцыю музэю гісторыі Магілёва. Прэзэнтацыя выданьня адбылася ў залі ўрачыстасьцяў ратушы.
Як кажа дырэктар музэю Аляксей Бацюкоў, набыты магілёўцамі экзэмпляр «Апостала» 1632 году выданьня першы ў Беларусі. Яшчэ па адным асобніку кнігі 1638 году мае Нацыянальная бібліятэка і бібліятэка Нацыянальнай акадэміі навук. Усяго вядома пра шэсьць кніг, якія захоўваюцца ў бібліятэках і музэях Украіны ды Расеі.
Набылі старадкук для магілёўскага музэя супольнымі намаганьнямі рупліўцаў беларускай даўніны і сродкамі, выдзеленымі з гарадзкога бюджэту. Займаліся пытаньнямі набыцьця кнігі пяць гадоў. Купілі яе ў адной з краінаў Эўразьвязу.
«У Магілёве з часоў вайны, калі нашы каштоўнасьці амаль усе зьніклі зь мясцовага музэя, не было ніводнага экзэмпляра кніг Сьпірыдона Собаля. Таму для нас стала справай гонару, каб у Магілёве адна з самых знакамітых асобаў была рэпрэзэнтаваная ягоным творам. А самым галоўным яго творам былі кнігі», — адзначыў Аляксей Бацюкоў на прэзэнтацыі.
Дырэктар музэю падзякаваў супрацоўнікам гарвыканкаму, якія, як ён сказаў, зразумелі наколькі важна гораду разьвіваць культурны і музэйны фонд. Кошт старадруку не называецца. Паводле Аляксея Бацюкова першапачаткова за яго прасілі 10 тысяч даляраў. Гэтую суму, казаў журналістам дырэктар музэю, удалося зьбіць прыблізна напалову.
Сьпірыдон Собаль выдрукаваў блізу пятнаццаці розных выданьня, некаторыя зь перавыдаваліся па некалькі разоў. Першыя кнігі «Апостала» ён надрукаваў у Кіеве ў 1630 годзе. Другі раз ужо ў Беларусі перавыдаў пасьля 1632 году ў друкарнях Куцеінскага і Буйніцкага праваслаўных манастыроў. Наладзіць кнігадрукаваньне дапамог яму магнат Багдан Статкевіч. Беларускія выданьні маюць адрозьненьні ад кіеўскіх аздабленьнем гравюраў і тэкстаў. У набытай кніжцы «Апостал» 222 старонкі.
Сьпірыдон Собаль нарадзіўся ў Магілёве. Дзякуючы бацьку-купцу атрымаў неблагую па часах сярэднявечча адукацыю. Валодаў грэцкай і лацінскай мовамі. Акрамя кніг рэлігійнага зьместу, Собаль выдаваў і агульнаадукацыйныя. Адзіны экзэмпляр яго «Буквара» захоўваецца ўва Львове. Дырэктар музэя гісторыі беларускай літаратуры Зьміцер Яцкевіч на прэзэнтацыі выказаў спадзеў, што ўдасца набыць і гэта рэдкае выданьне. На думку Яцкевіча, постаць друкара Сьпірыдона Собаля чакае навуковага пераасэнсаваньня.
У музэі гісторыі Магілёва захоўваецца больш за дзясятак старадрукаў. Сярод іх экзэмпляр Статуту Вялікага Княства Літоўскага 1588 году. Амаль усе старыя кнігі набываліся на ахвяраваньні.
