Сайт Tuzin.fm, на падставе апытаньня 90 экспэртаў, склаў сьпіс 100 найвялікшых беларускіх песень.
Узначальвае рэйтынг «Александрына» «Песьняроў», на другім месцы «Тры чарапахі» Лявона Вольскага, сьледам «Завіруха» «Верасоў», і замыкаюць пяцёрку зноў «Песьняры» і Лявон Вольскі: «Касіў Ясь канюшыну» і «Паветраны шар».
У сотню ўвайшлі песьні самых розных беларускіх выканаўцаў. Тут суседнічаюць «Народны альбом» і «Магутны Божа», этна-гурт «Троіца» і Аляксандар Саладуха, Neuro Dubel і «Сябры», «Ляпіс-Трубяцкі» і Міхал Клеафас Агінскі, народныя песьні і творчасьць Сярогі. У сьпіс патрапіла і больш як 10 песень, якія сьпяваў Данчык.
У дзясятку лепшых экспэрты занесьлі песьню «Радыё Свабода» гурту «Уліс» на музыку Вячаслава Кораня і словы Фэлікса Аксёнцава.
«Кампазыцыя, створаная на пачатку 1990 году ў Менску, стала ня толькі галоўнай песьняй гурту „Уліс“, але і сымбалем беларускага року ды неафіцыйным гімнам беларускага руху пачатку 90-х. Упершыню гэты твор выйшаў на вініле гурту „Уліс“ — „Краіна доўгай белай хмары“ (1990), запісанага і выдадзенага ў Польшчы. Расшыфраваць усе сэнсы, закладзеныя ў гэты твор, імкнуцца ўсё новыя і новыя выканаўцы. Праз 9 гадоў яе цудоўна перасьпявае N.R.M., а праз 24 гады — малады сьпявак Раман Волазьнеў зробіць фантастычную вэрсію, якая пераможа ў конкурсе кавэраў „Радыё Свабода“. І ў кожнага — свае наладкі на хвалю Радыё Свабода», — піша сайт Tuzin.fm.
Усе кавэр-вэрсіі песьні "Радыё Свабода" можна паслухаць тут.
