Васіль Быкаў памёр у 20 гадзін 30 хвілінаў 22 чэрвеня 2003 году, у анкалягічным цэнтры ў Бараўлянах — праз тры тыдні пасьля вяртаньня з Прагі, дзе ў сакавіку яму была зробленая апэрацыя.
Праз паўтары гадзіны Радыё Свабода выйшла ў прамы эфір з адмысловай гадзіннай перадачай, прысьвечанай народнаму пісьменьніку. Перадачу вялі Аляксандар Лукашук, Сяргей Навумчык і Віталь Тарас, словы пра Быкава сказалі Уладзімер Арлоў, Валянцін Тарас, Івонка Сурвіла, Вітаўт Кіпель, прагучалі запісы ўрыўкаў з твораў Быкава, якія ён начытаў перад мікрафонам Свабоды. У наступныя дні Свабода распавядала пра рэакцыю ў Беларусі і ў сьвеце на сьмерць Быкава, а 25 чэрвеня ў інтэрнэце вяла онлайн-рэпартаж з пахаваньня.
Пахаваньне Васіля Быкава адбылося без удзелу прадстаўнікоў уладаў — прадстаўнікі ўрадавай камісіі пакінулі Дом літаратара, калі сын Быкава пакрыў труну бацькі бел-чырвона-белым сьцягам. На пахаваньне не прыйшоў Аляксандар Лукашэнка, але разьвітацца зь пісьменьнікам прыйшлі дзясяткі тысяч людзей. Труну несьлі на руках да плошчы Якуба Коласа, да Ўсходніх могілак ішлі тысячы людзей пад бел-чырвона-белымі сьцягамі. Пазьней дзяржаўныя СМІ перадалі словы Лукашэнкі, што апазыцыя нібыта скарыстала пахаваньне пісьменьніка ў сваіх мэтах — аднак тое было сапраўднае народнае разьвітаньне.
Тэксты перадачы, якая выйшлі ў эфір адразу пасьля сьмерці Быкава, стэнаграмы грамадзянскай паніхіды ў Доме літаратара і разьвітаньня на могілках, рэпартажы зь менскіх вуліц, водгукі выбітных асобаў і простых людзей зьмешчаныя ў кнізе «Быкаў на Свабодзе», якую можна спампаваць тут.
Ніжэй — некаторыя матэрыялы з архіву Свабоды
«Ён прыехаў, сам памёр, усё спакойна...» Апошнія тыдні Васіля Быкава
«Рэакцыя грамадзтва і ўлады на сьмерць і пахаваньне Васіля Быкава» — аналітычная перадача Валерыя Карбалевіча з удзелам пісьменьніка Валянціна Тараса і дырэктара беларускай службы Радыё Свабода Аляксандра Лукашука.
У 2008 годзе, да пятай гадавіны са дня сьмерці пісьменьніка тэлеканалам «Белсат» быў зьняты фільм «Васіль Быкаў. Апошнія дні» (рэжысэр — Галіна Навумчык, аўтар сцэнару — Сяргей Навумчык).
25 чэрвеня 2003 году адбылося пахаваньне выбітнага беларускага пісьменьніка Васіля Быкава. У пахавальнай урачыстасьці, якая сталася вялікай маніфэстацыяй прыхільнікаў творчасьці й асобы пісьменьніка, удзельнічалі тысячы жыхароў Беларусі, дзяржаўныя чыноўнікі, літаратары, дзеячы апазыцыі, замежныя дыпляматы, дэпутаты й сябры пісьменьніка з усяе Эўропы.
