(Будаўнік: ) "Бэтаніраваць усё будзем, потым гідраізаляцыю рабіць, засыпаць і гэтак далей".
(Карэспандэнтка: ) "Колькі часу гэта ўсё зойме?"
(Будаўнік: ) "Раней за дарогу не зробіш".
(Карэспандэнтка: ) "А Вы ведалі пра тое, што ў Курапатах людзі жывуць ужо пяць месяцаў?"
(Будаўнік: ) "Хто тут ведаў..."
(Карэспандэнтка: ) "А як Вы ставіцеся да таго, што моладзь гэткім чынам пратэстуе, сочыць за будаўніцтвам, пад бульдозэры клаліся раней... Як Вы лічыце, варта гэта рабіць?"
(Будаўнік: ) "Канешне, трэба".
(Другі будаўнік: ) "Гісторыю абараняць трэба. А тое, што Лукашэнка... У "Комсомолке" пішуць, што зарплата падвысілася да 100 даляраў. Асабіста я атрымліваю 120 тысячаў. Тут няма 100 даляраў, хай не хлусяць, што заробкі цяпер — 100 даляраў. Ніхто такога ня мае".
Калі дождж крыху сьціх, некаторыя будаўнікі падыйшлі да стэнду "Курапаты — дарога сьмерці" ля намёту валанцёраў і пачалі чытаць пра гісторыю гэтага месца.
У намёце абаронцаў цяпер стала больш утульна. Зьявілася невялічкая канапа, якую надоечы прывез у лягер Вадзім Кішкурна. Ля намёту складзеныя дровы, якія валанцёры пілавалі ўчора. Але жыцьцё ў лягеры не выглядае спакойным. Гаворыць актывіст Цімур Сугака, які правёў у Курапатах ужо больш за два з паловай месяцы:
(Сугака: ) "Учора быў вельмі напружаны дзень. Тры разы прыходзілі нейкія п’яныя. Усе яны прапаноўвалі нам выпіць. Казалі нам: "Чаго вы тут сядзіце? Гэта ўсё роўна нічога не вырашыць. Гэтыя выпадкі нагадваюць нам тое, што было перад падзеямі 8 і 9 лістапада..."
Сёньня ў лягеры я засьпела Антося Шкурынскага. Учора лекары паставілі яму дыягназ — вострая форма бранхіту. Я запыталася ў Антося, як ён сябе адчувае:
(Шукурынскі: ) "Нармалёва, толькі кашляю, жару ўжо няма".
(Карэспандэнтка: ) "З такой хваробай Вам напэўна тут нельга знаходзіцца?"
(Шкурынскі: ) "Там настойваюць на шпіталізацыі, але я мяркую, што калі буду лекавацца дома ці на нейкай кватэры, вынік будзе той жа самы".
(Карэспандэнтка: )"А лекі маеце?"
(Шкурынскі: ) "Ёсьць антыбіётыкі й вітаміны".
(Карэспандэнтка: ) "Як паставіліся лекары да Вас, калі даведаліся, што Вы абараняеце Курапаты?"
(Шкурынскі: ) "Там сказалі: "Мы ведаем, хто ты такі". А ў іх на стале "Белорусская газета" ляжыць з рэпартажам пра абаронцаў".
