Чарговае папярэджаньне "Народнай Волі"

Папярэджаньне за подпісам міністар інфармацыі Алега Праляскоўскага тычыцца сэрыі публікацый Ільлі Копыла "Нябышына. Вайна", што друкавалася ў выданьні ў сакавіку 2010 года.

Спасылаючыся на заключэньне Інстытуту гісторыі Нацыянальнай акадэміі навук Беларусі, Мінінфармацыі цьвердзіць, што шэраг прыведзеных у публікацыях гістарычных зьвестак не адпавядае рэчаіснасьці.

"Распаўсюд непраўдзівай інфармацыі, …якая дыскрэдытуе партызанскі рух у Беларусі, дзеяньні Чырвонай Арміі ў пэрыяд Вялікай Айчыннай вайны", стаў прычынай правядзеньня грамадзянамі…пікетаў, а таксама новых праяваў негатыўнай грамадзкай рэакцыі".

Тэкст папярэджаньня апублікаваны на сайце Беларускай асацыяцыі журналістаў.

Паводле артыкулу 51 Закону "Аб сродках масавай інфармацыі" выхад выданьня можа быць спынены пры ўмове: "вынясеньне юрыдычнай асобе, на якую ўскладзеныя функцыі рэдакцыі сродку масавай інфармацыі, альбо заснавальніку (заснавальнікам) сродку масавай інфармацыі цягам году двух і больш пісьмовых папярэджаньняў".

"Мяне гэта абсалютна не хвалюе. Ёсьць свабода слова ў журналістаў і свабода слова ў чыноўнікаў. Кожны па-свойму разумее і кожны па-свойму дзейнічае ў адпаведнасьці са сваімі функцыямі", - заявіў Свабодзе галоўны рэдактар "Народная волі" Іосіф Сярэдзіч.

Камэнтар Ільлі Копыла: "Вельмі сумна, што так здарылася. Магчыма, і мая віна ў гэтым ёсьць, можа, ня трэба было публікаваць ім мае успаміны? Але ж калі паглядзець на лісты, якія прыйшлі ў "Народную волю", то грамадзтва патрабуе менавіта такой праўды пра вайну. Таму, я лічу, што трэба сказаць праўду, трэба пачынаць. Я проста паставіў пытаньне перад грамадзтвам, перад гісторыкамі, што з вайной ня ўсё ў парадку, і трэба разьбірацца, трэба пісаць праўду. І вось гэтыя лісты чытачоў "Народнай Волі" – гэта і ёсьць народная праўда пра вайну ".

У красавіку вэтэраны і актывісты БРСМ пікетавалі рэдакцыю "НВ" на знак пратэсту супраць публікаці Копыла.

Ільля Копыл, маёр артылерыі ў адстаўцы, нарадзіўся 2 жніўня 1934 году ў вёсцы Нябышына Бягомельскага раёну. Пасьля заканчэньня ў 1957-м Менскага артылерыйска-мінамётнага вучылішча служыў у Прыволскай вайсковай акрузе. З 1961 году праходзіў службу ў ракетных войсках стратэгічнага прызначэньня СССР. У часе вайны сям'я Копылаў была на акупаванай тэрыторыі. Успаміны аўтара пра ваеннае дзяцінства сталі асноваю кнігі “Нябышына. Вайна. Акупацыя вачыма падлетка”.