Пісьменьнік Уладзімер Арлоў, які сёньня быў у Мерачоўшчыне, паведаміў «Свабодзе», як шмат на ўрачыстасьці людзей з розных мясьцін Беларусі:
«На мэмарыяльным камені ля адноўленай сядзібы Тадэвуша Касьцюшкі напісана, што ён — ганаровы грамадзянін Францыі, нацыянальны герой Польшчы і ЗША. Няма ніякага сумневу, што Касьцюшка — нацыянальны герой Беларусі. Такім яго ўжо даўно лічыць патрыятычнае беларускае грамадзтва. Вось чаму дзясяткі людзей прыехалі сюды зь Берасьця, Менску, Баранавічаў, Горадні ды многіх іншых мясьцінаў».
Уладзімер Арлоў разам з Аляксандрам Саньнікавым і Аляксеем Янукевічам віталі прысутных на ўрачыстым мітынгу. Адбылося таксама ўскладаньне кветак да мэмарыяльнага знаку Тадэвуша Касьцюшкі ў Мерачоўшчыне.
Старшыня арганізацыйнага камітэту сёньняшняга мерапрыемства Аляксандар Мех удакладніў, што партыйныя і грамадзкія актывісты сьвяткуюць угодкі Тадэвуша Касьцюшкі паводле загадзя распрацаванай праграмы. Але, як кажа суразмоўца, замінае міліцыя.
Аляксандар Мех: «Калі я напярэдадні наведваў Івацэвіцкі райвыканкам, то знарок прасіў, каб мясцовыя ўлады не чынілі ніякіх правакацыяў. Яны ж запэўнівалі і абяцалі. Але калі я прыехаў у Косава раніцай, то практычна ўвесь пасёлак быў ачэплены міліцыянтамі».
Урэшце міліцыянты парушылі дамоўленасьць. Вялікая група гісторыкаў, краязнаўцаў і прадстаўнікоў дэмакратычных партыяў і рухаў зь Берасьця не патрапіла своечасова на ўрачысты мітынг. Аўтобус спынілі міліцыянты. Прычыны тлумачыць берасьцейскі актывіст Яўген Бяласін:
«Вадзіцель заявіў, што так прыдзірліва яго яшчэ не правяралі. Прастаялі мы даволі доўга, пакуль ня рушылі пехам у калёне. Толькі тады міліцыянты аддалі дакумэнты. Але ж мы ўсё ўжо страцілі на той час. Урачыстасьць цалкам скончылася бяз нас».
Пра Тадэвуша Касьцюшку і яго значнасьць у барацьбе за свабоду ў Беларусі кажа Ўладзімер Арлоў:
«Народжаны на беларускай зямлі, ён вучыўся ў кадэцкім корпусе ў Варшаве, пасьля ў вайсковай акадэміі ў Парыжы. Пасьля сем гадоў ваяваў за незалежнасьць ЗША. У 1794 годзе ён узначаліў вызвольнае паўстаньне. Тое паўстаньне, удзельнікі якога якраз адстойвалі эўрапейскі дэмакратычны выбар радзімы нашых продкаў — Вялікага Княства Літоўскага і Рэчы Паспалітай».
