پولیس وايي، د خیبر پښتونخوا په نوښار کې وسلوالو یو نرښځی وژلی دی.
د سیمې د پولیسو ویاند سید ترک علي شاه مشال راډیو ته د پېښې د ابتدايي تحقیقاتي رپورټ (اېف ای ار) یو نقل استولی دی چې له مخې یې نرښځیان د اپرېل پر دویمه سهار وختي په ګجو خان نظام پور کې د ښادۍ په یو محفل کې تر ګډون وروسته په ګاډي کې کور ته روان ول چې په خیر اباد سیمه کې ورباندې موټرسایکل سپرو وسلوالو ډزې وکړې.
د نرښځیانو یوې ملګرې نینا خان پولیسو ته په بیان کې ویلي، په ډزو کې یو ۴۰ کلن نرښځی ژوبل شو چې روغتون ته یې پر لاره سا ورکړه.
تر اوسه معلومه نه ده چې پر هغوی برید چا کړی دی خو پولیس وايي چې پلټنې یې پیل کړې دي او د لټون عملیات کوي.
په خیبر پښتونخوا او د پاکستان په نورو برخو کې ډېری نرښځیان د ودونو او ښادیو د موسیقیو په محفلونو کې ناڅي او دا یې د ګټې وټې یوه وسیله ده.
تر دې مخکې د خيبر پښتونخوا په نورو سيمو کې هم يوشمېر نرښځيان وژل شوي چې پرضد يې هغوی او د حقونو فعالانو په وار وار احتجاجونه کړي دي.
په خیبر پښتونخوا کې د ټرانسجېنډر الاینس په نوم د نرښځيانو د حقونو لپاره د کارکوونکي ناحکومتي سازمان وايي چې د هغوی د ټولو کړيو شمېرو له مخې، له ۲۰۱۵ز کال څخه تر ۲۰۲۴ز کال پورې په هغه صوبه کې ۱۲۵ نرښځيان وژل شوي دي.
د خیبر پښتونخوا حکومت او پولیس وايي چې د نرښځيانو امنیت ته ژمن دي. د صوبې پولیسو د ۲۰۲۳ز کال په نومبر کې ويلي ول چې په تاڼو کې د نرښځیانو د ستونزو هواري لپاره جلا څانګه پرانیزي.
