پښتون ژغورنې غورځنګ وايي د دوی مشر منظور پښتين د پنجاب له جهلم څخه د اټک زندان ته وړل شوی دی.
د غورځنګ یو مخکښ ادريس پښتين د جنورۍ پر ۳۰مه مشال راډيو ته وویل چې دا خبره د چکوال د پولیسو مشرې قرتعلېن ملک د جنورۍ پر ۲۹مه په راولپنډۍ کې د لاهور های کورټ په څانګه کې د منظور پښتین په اړه د مقدمې اورېدنې پر کړې ده.
منظور پښتين د جنورۍ له څلورمې د عامه نظم خرابولو په تور د چکوال د مرستیال کمشنر په امر د قانون د (درې ایم پي او) مادې له مخې د پنجاب د جهلم په زندان کې بندي وو.
بلخوا د چکوال د پولیسو مشر او د اټک زندان چارواکو تر اوسه په دې اړه څه نه دي ویلي.
د پښتون ژغورنې غوځنګ مشران وايي، د جنورۍ پر څلورمه چې عدالت په وروستۍ مقدمه کې هم منظور پښتین ته ضمانت ورکړ او هغه د راولپېنډۍ له اډیالې زندانه خوشې کېده نو د پنجاب پولیسو ونیوه او له ځان سره یې یووړ.
پښتون ژغورنې غورځنګ د خپل مشر منظور پشتین په ګډون د نورو ملګرو د خوشې کولو او په پښتون مېشته سیمو کې د ناامنیو پرضد احتجاجونه جاري ساتلي دي.
غورځنګ په دې ترڅ کې تر ټولو تازه احتجاج د جنورۍ پر ۲۸مه په لاهور کې کړی وو چې د یاد ښار پولیسو د غورځنګ یوشمېر هغه غړي نيولي وو چې د خپل مشر منظور پښتین د خوشې کولو لپاره یې د هغه ښار په ازادۍ څلورلاره (لېبرټي چوک) کې مظاهره کوله.
پولیس وايي، په صوبه کې یې ۱۴۴ دفعه لګولې چې له مخې یې د پینځو یا تر پینځو د زیاتو کسانو پر ورغونډېدو، جلسو او لاریونونو، د وسلې پر ګرځولو، د موټرسایکل پر غبرګې سپرلۍ او د لاوډ سپیکر پر ناسم استعمال بنديز وي.
پښتون ژغورنې غورځنګ پر خپل بندي مشر منظور پښتین لګېدلي تورونه ردوي او وايي چې د پاکستان په ایین کې دننه د پښتنو د حقونو لپاره سوله ییزه مبارزه کوي.
پر منظور پښتين ټولې څلورې مقدمې وې. د ډېسېمبر پر ۲۶مه عدالت د ترهګرۍ په دوو مقدمو کې د هغه ضمانت ومانه خو وروسته یې په يوه بله مقدمه کې د ترنول پولیسو ته په دوه ورځني جسماني رېمانډ وسپاره.
تر دې وړاندې، د ډېسېمبر پر ۱۸مه او ۲۳مه د پشتين د قضيې اورېدنه د جج د نه موجودیت له امله ځنډېدلې وه. البته د جنورۍ پر څلورمه د اسلام اباد عدالت د غورځنګ د بهرني تمویل په قضیه کې د پشتین د ضمانت درخواست منظور کړ.
د بلوچستان پوليسو منظور پشتين د ډېسېمبر پر څلورمه په چمن ښار کې هغه مهال ونیو چې کله هغه احتجاجي ناستې ته تر وینا وروسته په تربت کې د بلوڅانو په احتجاجي پرلت کې د ګډون لپاره روان وو. وروسته نوموړی د اسلام اباد پوليسو ته وسپارل شو.
د چمن ډېپټي کمېشنر راجا اطهر عباس مشال راډیو ته ويلي ول چې د پشتین خلاف مقدمه ځکه درج شوې او ځکه نیول شوی چې ساتونکو یې پر پوليسو ډزې کړې دي.
خو د پښتون ژغورنې غورځنګ دا تور ردوي او وایي چې ډزې د منظور پشتین پر موټر شوې چې نښې یې له ورايه ښکاري.
د پاکستان پوليسو منظور پشتين تر دې مخکې هم څو ځلې نیولی دی او پر هغه یې تور پورې کړی دی چې نوموړی د ریاست پر ضد د خلکو پارولو هڅه کوي خو نوموړی دا تورونه ردوي او وايي چې د پاکستان د ايين په چوکاټ کې دننه د پښتنو د حقونو لپاره مبارزه کوي او پر خپله سيمه امن غواړي.
