اسراییلی وزیراعظم بنیامین نتنیاهو په څلور ورځني سفر هنګري ته رسېدلی دی.
دا تر هغې وروسته د نوموړي اروپا ته لومړی سفر دی چې د جنایتونو نړیوال عدالت یې په غزه کې د "جنګي جرمونو د دعوو" د پلټنو لپاره د نیولو امر وکړ.
د هنګري د دفاع وزیر کرېستوف سالایې-بوبروفنېزکي د اپرېل پر درېیمه سهار وختي د پلازمېنې بوداپېست (بوداپېشت هم بلل کېږي) پر هوايي ډګر نوموړی ته هرکلی ووایه.
نوموړي وروسته پر فېسبوک د یو انځور پر خپرولو ولیکل: "بنیامین نتنیاهو، بوداپېست ته ښه راغلاست!"
نتنیاهو د جرمونو نړیوال عدالت پر امر سربېره ډاډه دی چې د خپل څلور ورځني سفر پر مهال به و نه نیول شي.
خو هنګري د نېدرلینډز په هېګ کې د هغه عدالت د غړي په توګه مکلف دی چې هغه ونیسي. البته د هغه هېواد کورنی قانوني جوړښت پېچلی دی چې حکومت ته یې د هغه د هرکلي موقع برابره کړې ده.
د ۲۰۲۴ز کال په نومبر کې چې د جنایتونو نړیوال عدالت د نتنیاهو د نیولو امر صادر کړ نو لږ وروسته ورته د هنګري وزیراعظم وېکتور اوربان هغه هېواد ته د ورتګ بلنه ورکړه.
اوربان هغه مهال ویلي ول: "زه ضمانت ورکوم، که هغه راشي نو د جرمونو نړیوال عدالت امر به پر هنګري هېڅ اغېز نه لري."
په همدې حال کې د هنګري حکومت د جنایتونو د نړیوال عدالت د غړیتوب پرېښودو اعلان کړی دی. د اوربان د دفتر مشر په بیان کې ویلي دي چې حکومت د اپرېل پر درېیمه له اساسي قانون (ایین) او نړیوال قانوني چوکاټ سره سم، د عدالت د غړيتوب پرېښود بهیر پیلوي.
د اسراییلو، روسیې، اوکراین، چین او امریکا په ګډون یوشمېر هېوادونه د هغه عدالت غړي نه دي نو ځکه یې په هغو هېوادونو کې امرونه او پرېکړې قانوني حیثیت نه لري.
د جنایتونو نړیوال عدالت په نومبر کې د نتنیاهو تر څنګ د اسراییلو د دفاع وزیر یواف ګلانت د نیولو امر هم کړی وو. هغه عدالت پر دواړو د غزې په جګړه کې د "بشریت ضد جنایتونو"، وژنو، او "د جنګ د یوې طریقې" په توګه "د لوږې د استعمالولو" په ګډون یوشمېر تورونه پورې کړي ول چې اسراییلو رد کړل.
د اسراییلو وزیراعظم دفتر د عدالت تر امر وروسته په بیان کې ویلي ول چې هغه "ټول تورونه ناسم او بې منطقه دي چې په کلکه یې ردوي."
په بیان کې د جرمونو نړیوال عدالت په "توپیرپالنې" تورن شوی وو او د نتنیاهو دفتر یوه "سیاسي" اداره بللې وه.
په غزه کې جګړه تر هغې وروسته پیل شوه چې حماس، چې امریکا او اروپايي ټولنه یې ترهګره ډله بولي، د ۲۰۲۳ز کال د اکتوبر پر اوومه پر اسراييلو په برید کې تر ۱،۲۰۰ زيات اسراييليان ووژل او شاوخوا ۲۵۰ یې يرغمل کړل.
تر هغې وروسته اسراييلو پر غزې بریدونه پيل کړل چې د حماس تر واک لاندې د روغتيا ادارې په وينا، پکې تر ۴۷،۰۰۰ زیات فلسطينيان ووژل شول، لکونه وګړي بې کوره شول او ګڼې سیمې ويجاړې شوې.
په هغه جګړه کې سلګونه اسراییلي پوځیان هم ووژل شول.
