اسراییلیو ځواکونو تر هغې وروسته په غزه کې پر یو روغتون برید کړی دی چې د دفاع وزیر اسراییل کټڅ په تړانګه کې د پوځي عملیاتو د پراختیا خبرداری ورکړ.
نوموړي دا خبرداری د اپرېل پر ۱۲مه تر هغې وروسته په بیان کې کړی چې اسراییلیو ځواکونو په سیمه کې پر یو امنیتي دهلېز ولکه ټینګه کړه.
اسوشيېټېډ پرېس اژانس وايي، د دهلېز په نیولو د مصر پولې ته نېږدې رفح ښار له پاتې تړانګې بېل شوی دی.
د فرانسې خبري اژانس وايي چې په بیان کې د خان یونس ښار او شاوخوا سیمو پر لسګونه زره اوسېدونکو د خپلو مېنو خالي کولو غږ شوی دی.
په همدې حال کې اسوشيېټېډ پرېس اژنس ویلي دي چې اسراییلیو ځواکونو د اپرېل پر ۱۳مه تر لمر خاته مخکې په غزه ښار کې پر الاهلي روغتون برید وکړ.
اژانس په غزه کې د روغتیا وزارت په حواله وايي چې اسراییلو ځواکونو ورته تر حملې مخکې د روغتون خالي کولو امر کړی وو. وزارت په بیان کې ویلي چې کارکوونکو ډېری مریضان وایستل خو یو کس، چې ورته پر وخت بیړنۍ طبي مرسته نه وه رسېدلې، د ودانۍ خالي کولو پر وخت ومړ.
د جرمني خبري اژانس وايي چې اسراییلیو ځواکونو برید تایید کړی دی او ویلي یې دي چې موخه یې د حماس، چې امریکا او اروپايي ټولنه یې ترهګره ډله بولي، د قوماندې مرکز په نخښه کول وه.
د اسراییلو د دفاع وزیر اسراییل کټڅ د اپرېل پر ۱۳مه په بیان کې د حماس د ختمولو او ورڅخه د ټولو یرغملیانو د خلاصولو هوډ ښوولی دی.
دا په داسې حال کې ده چې حماس ویلي دي چې له اسراییلو سره یې د اوربند په هوکړه کې پرمختګ کړی دی.
اسراییلو د مارچ پر ۱۸مه له حماس سره اوربند ختم کړ او پر غزې یې درانه هوايي بریدونه وکړل.
د ملګرو ملتونو د بشري حقونو عالي کمېشنر فولکر ترک د اپرېل پر درېیمه د ملګرو ملتونو په امنیت شورا کې د منځني ختیځ او غزې پر وضعیت غونډې ته ویلي ول چې له مارچ راهیسې په غزې کې په اسراییلیو عملیاتو کې ۱،۲۰۰ فلسطینیان وژل شوي دي.
حماس د مارچ ۱۸مې تر بمبارۍ وروسته ویلي ول اسراییلو نه یوازې د اوربند د موافقې سرغړونه کړې بلکې په غزه کې یې ۵۹ یرغملیان له نامعلوم برخلیک سره مخامخ کړي دي.
د یرغملیانو او د هغوی د مړیو سپارل د حماس او اسرایيلو ترمینځ د اوربند د هغې موافقې د لومړي پړاو برخه وه چې په غزه کې تر څه باندې یو کال وروسته سږ کال د جنورۍ له ۱۹مې څخه عملي شو.
حماس د ۲۰۲۳ز کال د اکتوبر پر اوومه پر اسراييلو برید کې تر ۱،۲۰۰ زيات اسراييليان ووژل او شاوخوا ۲۵۰ یې يرغمل کړل.
تر هغې وروسته اسراييلو پر غزې بریدونه پيل کړل چې د حماس تر واک لاندې د روغتيا ادارې په وينا، د اوربند تر پیلېدو پورې پکې شاوخوا ۴۷،۰۰۰ فلسطينيان ووژل شول، لکونه وګړي بې کوره شول او ګڼې سیمې ويجاړې شوې.
په هغه جګړه کې سلګونه اسراییلي پوځیان هم ووژل شول.
