په یمن کې حوثي یاغیانو تایید کړې چې د اسراییلو په وروستي برید کې یې وزیراعظم او د کابینې لوړپوړي غړي وژل شوي دي.
اسوشيېټېډ پرېس، رویټرز او نورو اژانسونو د حوثیانو په حواله ویلي، د هغوی وزیراعظم احمد غالب ناصر الرهوي د اګست پر ۲۸مه د اسراییلو په هوايي برید کې وژل شوی دی.
اژانسونه وايي، دا د هغې ایران پلوې ډلې پر وړاندې د اسراییلو، امریکا او برېتانیا د بمباریو له پیل راهیسې تر ټولو لوړپوړی کس دی چې وژل شوی دی.
حوثیانو د الرهوي وژنه د اګست پر ۳۰مه تایید کړه او د غچ اخیستو خبرداری یې ورکړی دی. هغې ډلې ویلي دي چې د اسراییلو په برید کې یوشمېر وزیران هم وژل شوي دي.
الرهوي له ۲۰۲۴ز کال راهیسې د حوثیانو په حکومت کې د وزیراعظم په توګه دنده ترسره کوله.
اسراییلو د اګست پر ۲۸مه ویلي ول چې ځواکونو یې په صنعا کې د حوثیانو یو پټنځای په نخښه کړی دی او زیاته کړې یې وه چې په برید کې یې د ډلې لوړپوړي سیاسي مشران وژلي دي.
امریکا د روان کال په پیل کې هغه ډله یو ځل بیا "د بهرني ترهګر سازمان" په نوملړ کې واچوله.
حوثیان د یمن پر پلازمېنه صنعا او یوشمېر نورو سیمو واکمن دي خو نړیواله ټولنه یې حکومت په رسمیت نه پېژني. هغوی په ۲۰۱۵ز کال کې پلازمېنه ونیوله او د هغه وخت ولسمشر یې سعودي عرب ته تېښتې ته اړ کړ. تر دې وروسته د سعودي عرب په مشرۍ نړیوال اېتلاف د حوثیانو پرضد جګړه پیل کړه.
حوثي یاغیانو د ۲۰۲۳ز کال له نومبر راهیسې په سره سمندرګي کې پر کاروباري کښتیو حملې کړې دي. هغې ډلې دا بریدونه تر هغې شاوخوا یوه میاشت وروسته کړي ول چې اسراییلو په غزه کې د حماس، چې امریکا او اروپايي ټولنه یې ترهګره ډله بولي، پر وړاندې جګړه پیل کړه چې لا هم دوام لري.
د دې په ځواب کې اسراییلو، امریکا او برېتانیا څو ځلې د حوثیانو پر اهدافو ځوابي حملې وکړې.
