د سعودي عرب په ګډون د نړۍ په بېلابېلو هېوادونو کې مسلمانان لوی اختر لمانځي او قربانۍ کوي.
دا په داسې حال کې ده چې د پاکستان د رویت هلال سرکاري کمېټۍ او په افغانستان کې د طالبانو سترې محکمې په ګډون هند، بنګلادېش او ایران د جون پر ۱۷مه د لوی اختر لمانځلو اعلان کړی دی.
د مشال راډیو خبریال وايي چې د شمالي وزیرستان په ځينو کلیو کې هم ځینې خلک د جون پر ۱۶مه اختر لمانځي او د پېښور په کچه ګړۍ کې مېشتو افغانانو هم د لوی اختر لمونځ کړی دی.
په سعودي عرب کې تر ۱۵ لکه زیاتو مسلمانانو د عرفات پر غونډۍ د حج مناسکو تر سره کولو وروسته د جون ۱۶مې پر سهار د ابراهیمي سنت له مخې د څارویو قرباني ورکړه.
په افغانستان کې پخوا حکومتونو روژه، کوچني او لوی اخترونه له سعودي عرب سره یو ځای کول خو دا په ۲۰۲۱ز کال کې د طالبانو له واکمنېدو راهیسې لومړی ځل دی چې سترې محکمې یې د میاشت لیدو عمل په بشپړولو تر سعودي عرب یوه ورځ وروسته د اختر لمانځلو اعلان وکړ.
د پاکستان حکومت د اختر په مناسبت د جون له ۱۷مې څخه تر ۱۹مې پورې عامه رخصتي (چوټي) اعلان کړې ده.
