د خیبر پښتونخوا چارواکي وايي په ایبټ اباد کې په یوه ټرافیکي پېښه او په نوښار کې د یو کور د چت پرېوتو له وجې لږ تر لږه ۱۱ کسان وژل شوي دي.
د خيبر پښتونخوا د ژغورنې ادارې ريسکيو ۱۱۲۲ وياند بلال فیضي مشال راډيو ته وويل چې د ایبټ اباد په برن ګلۍ سيمه کې د نومبر په ۲۲مه یو ګاډی یوې کندې ته پرېووت چې د دوو ښځو په ګډون پکې شپږ کسان ووژل شول.
نوموړی وايي پېښه د ګاډي د برېکونو د فېل کېدو له وجې رامنځته شوې ده.
بلخوا د نوښار ضلعې د ژغورنې ادارې وياند نبيل خان مشال راډيو ته وويل چې د نومبر پر ۲۲مه په ډاګ جديد سيمه کې د یو کور د چت پرېوتو پېښه کې د يوې کورنۍ پينځه تنه ووژل شول چې څلور پکې ماشومان دي.
نوموړی وايي په پېښه کې درې کسان ژوبل هم دي.
د خیبر پښتونخوا په کليوالو سیمو کې ډېری کورونه کچه او له خاورو جوړ دي او اکثر په باراني موسم کې پرېووځي.
