د امریکا په جنوبي ایالت کینټکي کې د یوې بار لېږدوونکې الوتکې د پرېوتو په پېښه کې د وژل شویو شمېر ۱۲ ته لوړ شوی دی.
پلټونکي وايي، پېښه د نومبر پر څلورمه مازیګر مهال د الوتکې په یو انجن کې د اور لګېدو له وجې شوې ده.
چارواکي وايي، د الوتکې پرېوتو او پکې د اورلګېدو له وجې پر ځمکه هم یوشمېر کسانو ته مرګژوبله واوښته.
د جرمني خبري اژانس وايي، د کینټکي د لوييوېل ښاروال کرېګ ګرینبرګ د نومبر پر پینځمه ناوخته رسنیو ته وویل، په پېښه کې د وژل شویو شمېر ۱۲ ته رسېدلی دی او پکې تر ۱۲ زیات کسان ژوبل هم دي چې د ځینو روغتیايي وضعیت خراب دی.
سي اېن اېن ټېلېوېژن وايي، چارواکي په پېښه کې د مړینو د زیاتېدو وېره څرګندوي.
ټېلېوېژن زیاتوي چې چارواکو لا د پېښې ښکار شویو کسانو پېژندګلوي نه ده کړې.
اې اېف پي اژانس وايي، د مک ډانېل ډګلس - ۱۱ الوتکه هوايي ایالت ته پرواز کاوه چې د لوييوېل له محمد علي هوايي ډګره تر الوت لږ ساعت وروسته پرېوته.
په لوييوېل ښار کې پلټونکو خبریالانو ته ویلي، موندنې یې ښيي چې کیڼ یا چپ انجن د پرواز پر مهال له الوتکې جلا شو.
