په افغانستان کې د طالبانو حکومت يو امریکايي وګړی له زندانه خوشی کړی دی.
د امریکا د بهرنیو چارو وزیر د طالبانو له زندانه د امریکايي تبعه امیر امیري د ازادېدو هرکلی کړی دی. مارکو روبیو، په اېکس پاڼه (پخوانی ټويټر) په یوه بیان سره د امیر امیري د ازادېدو د هرکلي تر څنګ ویلي دي چې "په ناحقه په افغانستان کې بندي شوی وو."
نوموړي د امیر امیري د خوشې کېدو په برخه کې د قطر هېواد د رول لوبولو مننه هم کړې ده.
د طالبانو د بهرنیو چارو وزارت د سپټېمبر پر ۲۸مه ناوخته اعلان وکړ چې د "امیر امیري" په نوم یو امریکایي تبعه د امریکا د ولسمشر د ځانګړي استازي د غیر مترقبه سفر پر مهال له زندانه ازاد شوی دی.
د طالبانو د بهرنیو چارو وزارت د اعلامیې له مخې، د طالبانو د حکومت بهرنیو چارو وزیر مولوي امیر خان متقي د امریکا د ولسمشر د ځانګړي استازي اډم بولر سره په لیدنه کې ویلي چې د هغوی حکومت "د اتباعو مسایلو ته له سیاسي زاویې نه ګوري، بلکې د ډیپلوماسۍ له لارې د حل په لټه کې دی. " نوموړي دا اقدام د مثبت پرمختګ په لور یو ګام بللی او د قطر د دولت له اغېزمن رول څخه یې مننه کړې ده.
تر دې وړاندې طالبانو د سېپټېمبر پر ۱۹مهیو برتانوی مېړه او مېرمن چې له شاوخوا ۷ میاشتو راهیسې په افغانستان کې د نامعلومو تورونو له مخې نیول شوي وو، خوشې کړي ول. قطر د دوی په خوشې کولو کې مرسته کړې وه.
