د خیبر پښتونخوا د کواټ (کوهاټ) پولیس وايي وسلوالو د یو افسر په ګډون دوه پولیس وژلي او تر پېښې وروسته تښتېدلي دي.
د کواټ پولیس چارواکو رسنیو ته ویلي چې وسلوالو د لاچۍ تاڼې په حدودو کې پولیس انسپکټر طاهر نواز او سپاهي محمد علي په ډزو وژلي دي.
د دوی په وینا، د دې برید مقدمه یې د نامعلومو وسلوالو پرضد درج کړې ده. چا تر اوسه د دې برید ذمه واري نه ده منلې.
بل پلو د بنو پولیس وايي، وسلوالو د ګیس نللیکه یا پایپ لاین په بم الوزولی او څلور مزدوران یې تښتولي دي.
د پولیسو په وینا، د بنو د میریان تاڼې په حدودو کې له ټوچي پل سره د سېپټمبر پر ۴مه د شپې وسلوالو ګیس پایپ لاین په بارودي موادو الوزولی او بیا یې د ګېس کمپنۍ څلور مزدوران تښتولي دي.
د بنو پولیسو رسنیو ته په لېږلي بیان کې ویلي چې نامعلومه وسلوال ورغلي او لومړی یې د ګیس نللیکه په بم الوزولې او چې د کمپنۍ کارکونکي یې د رغوولو لپاره ورغلي نو دوی له ځان سره وړي دي.
د پولیسو بیان زیاتوي چې تر اوسه دا نه ده معلومه چې دا مزدوران چا تښتولي او چېري یې وړي دي. چا تر اوسه د دې پېښې زمه واري هم نه ده منلې.
پولیس وايي چې دوی د تښتول شویو کسانو د میندلو او خوشي کولو لپاره د لټون عملیات پیل کړي دي خو تر اوسه یې هغوی میندلي نه دي.
یاد ګیس پایپ لاین د شمالي وزیرستان له شیوې څخه پنجاب ته غزیدلی چې له بنو تیر شوی دی. وسلوالو تر دې وړاندې هم پر دې پایپ لاین او مزدورانو بریدونه کړي دي.
د خیبر پښتونخوا په یو شمېر سیمو کې په دې وروستیو کې امنیتي حالات لا پسې خراب شوي دي.
د سېپټمبر پر دریمه هم ناڅرګندو وسله والو د کرک ضلعې د داود شاه بانډې د تاڼې ایس ایچ او عمر نواز او دوه نور عسکر په ډزو وژلي او بیا تښتېدلي وو.
تر هغه وړاندې د سېپپټمبر پر دویمه بیا وسلوالو په بنو کې د ایف سي ځواک پر مرکز لومړی ځانمرګی برید کړی وو او بیا هغه مرکز ته ننوتي وو.
امنیتي ځواکونو هغه مهال له وسلوالو سره ۱۲ ساعته نښته کړې وه. د پولیسو سیمه ییز مشر سجاد خان تر عملیاتو وروسته رسنیو ته ویلي وو چې په هغه پېښه کې شپږ امنیتي عسکر وژل شوي او ۱۹ ټپي شوي وو.
د ده په وینا، د عملیاتو پر مهال یې شپږ برید کوونکي وژلي وو.
