د اوکراین چارواکي وايي د روسیې هوايي بریدونو په زاپروژیا ښار کې لږ تر لږه یو کس وژلی او ۲۲ نور یې ژوبل کړي دي چې درې پکې ماشومان دي.
اوکرایني چارواکي وايي روسیې د اګست پر ۲۹مه د زاپروژیا په ګډون د اوکراین په بېلابېلو ښارونو کې له ۵۰۰ زیات د ډرون بریدونه کړي او ۴۵ توغندي یې ورولي دي. د اوکراین هوايي ځواک د اګست پر ۳۰مه په یو بیان کې ویلي دي چې ۵۳۷ ډرون بریدونه او ۳۸ د توغندیو بریدونه شنډ کړل شوي دي.
د اوکراین ولسمشر وولودومیر زېلېنسکي د اګست پر ۳۰مه پر اېکس (پخواني ټوېټر) لیکلي دي چې روسیې په زاپروژیا کې د استوګنې په یوې پینځه پوړیزې ودانۍ په برید کې ولسي کسان په نخښه کړي دي. د نوموړي په وینا د اوکراین د بیړنیو خدمتونو ادارې له لګېدلې ودانۍ د خلکو په راویستلو بوختې دي.
په ورته مهال اوکرایني چارواکي خبر ورکوي چې د هغه هېواد د پارلیمان پخوانی مشر اندرې پاروبي په لویدیز لویف ښار کې په ډزو ویشتل شوی دی. د اوکراین ولسمشر وولودومیر زېلېنسکي د اګست پر ۳۰مه د اندرې پاروبي د وژنې د پېښې په تاییدولو سره ویلي دي چې دا یوه "وحشتناکه" پېښه ده.
د اوکرایني چارواکو په وینا ناپېژانده وسلوالو غرمه مهال پر اندرې پاروبي ډزې وکړي او له سیمې وتښتېدل.
ولسمشر زېلېنسکي ویلي دي چې د اندرې پاروبي د وژنې په اړه به څیړنې کوي.
اندرې پاروبي ۵۴ کلن وو او د ۲۰۱۶ز کال نه تر ۲۰۱۹ز کاله پورې یې د اوکراین د پارلیمان د مشر په توګه دنده پر مخ وړې وه.
