په تیرا کې خلک وايي د ناامنۍ او پوځي عملیاتو له وېرې ماشومان سکولونو ته نه شي لېږلی
د خیبر ضلعې د لرې پرتې غرییزې سیمې تیرا ولسي خلک او مدني فعالان وايي د ناامنۍ او پوځي عملیاتو له وېرې ماشومان سکولونو ته نه شي لېږلی. په سیمه کې د تعلیم لپاره کارکوونکي مدني فعال خادم خان د اګست پر ۲۹مه مشال راډیو ته وویل چې سلګونه ماشومان له دې وېرې ښوونځيو ته نه ځي او په کور ناست دي. د سیمې خلک وايي په دې وروستیو کې د ناامنۍ پېښو او د توغندیو لګېدو ماشومانو ته مرګ ژوبله ور اړولې ده. دوی له حکومته غوښتنه کوي چې ماشومانو ته دې د زده کړو لپاره خوندي چاپیریال برابر کړي. بل پلو د خیبر ضلعې د تعلیم د څانګې مشر مصري خان د اګست پر ۲۹مه مشال راډیو ته وویل، په تیرا کې ټول سکولونه پرانیستي دي او ورته د حکومت لخوا په رسمي ډول د سکولونو د تړلو په اړه څه نه دي ویل شوي. نوموړی زیاتوي کورنۍ د ناامنۍ له وېرې پخپله ماشومان سکولونو ته نه لېږي. د خیبر ضلعې د تعلیم ادارې د معلوماتو له مخې په تیرا کې ۱۵ دولتي او ۲۰ شخصي ښوونځي موجود دي چې ورکې څه باندې ۱۳،۰۰۰ ماشومان داخل دي. نور حال په دې راپور کې.